Kaluma Adai Walioteketeza Kituo cha Polisi cha Mawego Waliletwa Kutoka Nairobi

Mbunge wa Eneo Bunge la Homa Bay Town, Peter Kaluma, amewatetea wanafunzi na wakazi wa eneo la Mawego dhidi ya madai ya kuhusika na kuchoma Kituo cha Polisi cha Mawego.

Kupitia ukurasa wake rasmi wa X usiku wa Alhamisi, Julai 3, 2025, Kaluma alidai kuwa vurugu hizo zilipangwa na wahuni waliolipwa na kusafirishwa kutoka jijini Nairobi.

Mbunge huyo kutoka chama cha Orange Democratic Movement (ODM) alieleza hasira na masikitiko, akisisitiza kuwa jamii inayozunguka Taasisi ya Mafunzo ya Ufundi ya Mawego haikuhusika katika ghasia zilizolisababisha jengo la kituo hicho kuharibiwa kufuatia kuwasili kwa mwili wa mwalimu aliyeuawa, Albert Ojwang’.

Kwa mujibu wa Kaluma, jamii hiyo imekuwa ikiishi na kituo cha polisi kwa miaka mingi, na hata baada ya mauaji ya Ojwang’, hawakuwahi kukichoma.

“Wahuni walioteketeza Kituo cha Polisi cha Mawego waliletwa kutoka Nairobi. Wanafunzi wetu wa Mawego na wanafunzi kutoka maeneo yetu hawakukichoma kituo hicho. Wamekuwa wakiishi na kituo hicho kwa miaka mingi, hata baada ya mwana wetu Albert Ojwang kuuawa. Wapimou!” Kaluma alisema.

Hasira kali zilitanda katika Kaunti ya Homa Bay mnamo Julai 3, 2025, baada ya wakazi wenye ghadhabu kuchoma Kituo cha Polisi cha Mawego wakipinga kifo tata cha mwalimu na mwanablogu mwenye umri wa miaka 31 aliyekuwa chini ya ulinzi wa polisi.

Tukio hilo liliashiria hatua ya juu zaidi katika wito wa kitaifa wa uwajibikaji na mageuzi ndani ya idara ya polisi.

Katika maandamano yenye hisia kali na huzuni, mamia ya waombolezaji na wakazi waliokuwa na hasira walitembea kwa maandamano hadi kituo cha polisi cha Mawego wakiwa wamebeba mwili wa Ojwang’—mahali aliposhikiliwa kwa mara ya mwisho kabla ya kupelekwa Nairobi.

Umati huo uliimba nyimbo za kudai haki, wakibeba mabango yenye picha ya Ojwang’ na kuwatuhumu polisi kwa kuficha ukweli.

Wakati hisia zilipofika kileleni, baadhi ya waandamanaji walivamia uzio wa kituo hicho na kuwasha moto kwenye baadhi ya sehemu za jengo hilo.

Moshi mzito ulitanda angani huku moto ukiteketeza ofisi na nyaraka mbalimbali, na polisi wakilazimika kukimbia mbele ya umati uliowazidi kwa idadi.

Taswira hiyo ya kusikitisha ilidhihirisha huzuni ya kina na hasira ya jamii hiyo, na kugeuza maandamano hayo kuwa ishara ya upinzani dhidi ya ukatili na utepetevu wa polisi.