Matiang’i: Nikichaguliwa Rais, Sitabeba Biblia kwa Kujionesha kama Ruto

Waziri wa zamani wa Usalama wa Ndani, Fred Matiang’i, ametangaza wazi kuwa endapo atachaguliwa kuwa rais, hatashiriki vitendo vya kuonesha unafiki wa kidini hadharani.

Akizungumza jijini Maryland, Baltimore, Jumapili, Julai 20, 2025, Matiang’i alisisitiza kuwa uongozi wake utaongozwa na ukweli na uhalisia badala ya maigizo ya hadharani ya kuonesha uadilifu wa kinafiki.

“Nikichaguliwa kuwa rais, sitakuwa nikizunguka na Biblia ili nionekane mtakatifu kuliko wengine. Siko hapa kuigiza utakatifu—niko hapa kuongoza kwa uaminifu. Mimi ni mwenye dhambi halisi. Ninapokosea, sifanyi maigizo mbele ya kamera. Ninaingia chumbani kwangu kwa faragha, na kupiga magoti kumuomba Mungu msamaha—kimya, kwa unyenyekevu na kwa dhati,” alisema Matiang’i.

Alikosoa vikali matumizi ya dini kama chombo cha kisiasa, akisisitiza kuwa imani ya kweli ni ya kibinafsi na si kitu cha kuonyeshwa ili kupata sifa au kuungwa mkono.

Matiang’i alieleza kuwa anatambua mapungufu yake na huchagua kutafuta mwongozo wa kiroho kwa faragha badala ya kufanya hivyo mbele ya umma.

Akijitambulisha kama kiongozi anayethamini ukweli kuliko sura ya nje, alieleza dhamira yake ya kutoa uongozi wa unyenyekevu unaoweka mbele maslahi ya wananchi badala ya maonesho.

“Uongozi si juu ya kuonekana mkamilifu. Ni juu ya kuwa halisi. Na ningependelea kuwa mtu mwenye mapungufu anayemtafuta Mungu kwa siri kuliko mnafiki anayejifanya mtakatifu mbele ya watu,” aliongeza.

Kauli hizi zinakuja siku chache baada ya Matiang’i kumkosoa vikali Rais William Ruto katika mahojiano na runinga ya Kameme mwezi Julai 2025, akimtuhumu kwa kutumia dini kwa faida za kisiasa.

Katika mahojiano hayo, Matiang’i alimshutumu Ruto kwa kutumia vitendo vya kidini—kama kubeba Biblia kubwa na kuimba nyimbo za Kikristo wakati wa kampeni—kujionesha kama kiongozi wa kiroho huku akikosa kutekeleza majukumu ya kiuongozi. Aliyataja matendo hayo kuwa “mchezo wa uwongo”, na kuwataka Wakenya kuzingatia matendo ya viongozi badala ya uonyeshaji wao wa dini hadharani.

Matamshi haya ya Matiang’i yanachukuliwa kama sehemu ya mkakati wake wa kampeni ya urais wa 2027, ambapo pia alimkosoa Ruto kuhusu jinsi alivyoishughulikia maandamano ya kizazi cha Gen Z mwaka 2024, akimwelezea kama kiongozi anayejali zaidi taswira kuliko uadilifu.