Sifuna: Niko Tayari Kujiuzulu Ukatibu Mkuu wa ODM Ikiwa Nitaombwa Kufanya Hivyo

Nairobi, Kenya, Julai 23, 2005 — Katibu Mkuu wa Chama cha ODM Edwin Sifuna amesema yuko tayari kujiuzulu kutoka wadhifa wake ikiwa uongozi wa chama utapoteza imani naye.

Kauli yake imeibua mjadala mkali ndani ya chama, hasa kutokana na mwelekeo wa ODM kushirikiana na serikali ya Kenya Kwanza.

Akizungumza katika mahojiano na Citizen TV usiku wa Jumanne, Sifuna alisema:

“Kama nikiombwa kuachia nafasi ya Katibu Mkuu wa ODM, nitaondoka. Nafasi hii si yangu. Kama yule aliyenipa kazi hii atanipigia simu leo na kuniambia kuwa hana tena imani nami, nitaachia mara moja.”

Kukosolewa kwa ODM kwa Ushirikiano na Serikali

Kauli ya Sifuna inakuja wakati ambapo baadhi ya wanachama na wafuasi wa ODM wanakosoa chama kwa kile wanachokiona kama kulegeza msimamo wake wa upinzani.

Kutetea kwake mwelekeo wa chama kumemuweka katika mgongano na baadhi ya makundi ndani ya ODM.

Hata hivyo, Sifuna alisisitiza kuwa bado anaamini katika maono ya chama.

“Sijakata tamaa na ODM. Bado kuna imani kwamba Baba anajua nini ni kizuri kwa watu na atafanya kilicho sahihi.”

Aliongeza kuwa ikiwa siku moja atahisi chama hakiko katika njia sahihi, atakiri hadharani.

“Siku nitakayo kata tamaa, nitasema wazi kuwa nimepoteza vita vya kukirejesha chama mahali kilikokuwa awali.”

Akataa Kujiunga na Vyama Vipya

Sifuna alikanusha madai kwamba anapanga kuanzisha chama kipya au kujiunga na Green Thinking Action Party.

“Si lazima niwe Katibu Mkuu. Nafurahia kuwa samaki mdogo kwenye bwawa kubwa kuliko kuwa samaki mkubwa kwenye bwawa dogo,” alisema.

Uchaguzi wa 2027 na Uwezekano wa Kufanya Kazi na Matiang’i

Kuhusu uchaguzi wa 2027, Sifuna alipinga hoja kuwa ODM imeishiwa viongozi.

“ODM haijaishiwa viongozi. Hakutakuwa na nafasi ya hisia. Lengo ni kumuondoa William Ruto mamlakani — hata kama sisi si malaika.”

Alipohojiwa kuhusu uwezekano wa kushirikiana na aliyekuwa Waziri wa Usalama wa Ndani Fred Matiang’i, alisema:

“Matiang’i ana dosari zake. Lakini kama anaweza kutusaidia kumuondoa Ruto, basi sawa.”

ODM Kufanya Mkutano Mkuu Oktoba

ODM imetangaza kuwa itafanya Mkutano Mkuu wa Kitaifa (NDC) mwezi Oktoba 2025. Katika mkutano huo, chama kitapanga safu mpya ya viongozi, hatua muhimu kuelekea uchaguzi mkuu wa 2027.