NAKURU, KENYA, Julai 29, 2025 — Katika tukio la kusikitisha lililotikisa jiji la Nakuru Jumatatu alasiri, mwili wa mwanamke mmoja aliyefahamika kwa jina la Zuchu ulipatikana ukiwa hauna uhai katika chumba cha kulala cha Umoja Lodge, karibu na Barabara ya Lee Njiru.
Zuchu, ambaye alifahamika miongoni mwa wenzake kama kahaba mchangamfu na mwenye huruma, alionekana mara ya mwisho akiwa na mwanaume mmoja usiku wa kuamkia Jumatatu.
Mwili wake ulipatikana asubuhi ya siku iliyofuata, ukiwa kitandani katika chumba walichokuwa wamekodi.
Zuchu aliondoka na mwanaume mmoja kutoka kwenye burudani ya usiku, na hakurejea. Sasa mashirika ya haki yanataka chumba hicho cha kulala kitoe majina na taarifa za mwanaume huyo ili kusaidia uchunguzi wa polisi.
Kauli za Mashuhuda na Wahusika:
Charity Wanjiru, rafiki wa karibu wa marehemu, alisema:
"Tulikuwa tunakunywa naye pamoja na marafiki wengine jioni. Alikuja mwanaume mmoja aliyekuwa anakula muguka. Kwa kuwa Zuchu hakula, alimnunulia kinywaji badala yake. Baadaye tulienda kupata chakula, lakini Zuchu akasema atabaki na huyo jamaa."
Wanjiru aliendelea kueleza kuwa Zuchu aliandamana na mwanaume huyo hadi burudani nyingine ambapo walikutana tena:
"Alinunuliwa kinywaji kingine. Baada ya muda wakaondoka pamoja, nami nikabaki. Asubuhi, nikashtuka kusikia kuwa amefariki."
Kwa huzuni, Wanjiru alimwelezea marehemu kuwa mama mwenye kujali na aliyejitolea kusaidia wengine katika mazingira magumu ya kazi yao:
"Zuchu alikuwa msaidizi wetu na dada wa kweli. Hali si rahisi kwa kahaba; unahitaji moyo wa ziada kustahimili maisha."
Kwa upande mwingine, Emilly Nekesa kutoka shirika la Smart Ladies, ambalo linatetea haki za makahaba mjini Nakuru, alitoa kauli kali akitaka lodge hiyo iwajibike:
"Tunataka usimamizi wa lodge utoe taarifa za aliyemuingiza Zuchu humo. Kuna utaratibu wa kutoa kitambulisho na mawasiliano. Kama malipo yalifanywa kidijitali, basi ni rahisi kufuatilia."
"Hakuna anayestahili kufa kwa njia ya kinyama namna hii, hata kama ni kahaba. Haki lazima itendeke," aliongeza kwa msisitizo.
© Radio Jambo 2024. All rights reserved