Nairobi, Kenya, Julai 30, 2025 — Mbunge wa Embakasi Mashariki, Paul Ongili, almaarufu Babu Owino, amejiweka wazi kama mtetezi wa wanyonge na vijana wa kizazi kipya – maarufu kama Gen Z – akiahidi kutoa msaada wa kisheria bila malipo kwa Wakenya wasiojiweza.
Tamko hilo limejiri wakati ambapo taifa limekuwa likishuhudia ongezeko la machafuko ya kijamii, kukamatwa kiholela, na madai ya ukiukaji wa haki za binadamu dhidi ya vijana, hasa wale waliokuwa mstari wa mbele katika maandamano ya mitandaoni na mitaani.
Babu, ambaye ana taaluma ya sheria, alieleza kuwa aliona haja ya kujitokeza si kama mwanasiasa pekee, bali kama wakili aliye tayari kutumikia wananchi kwa njia ya kisheria.
“Watu wetu wamechoka. Wengi wao hawana hata mia ya kuanza kufungua faili la kesi. Wengine wamefungwa bila kusikizwa. Ni wakati sasa viongozi wasimame na kutenda – si kuongea tu.”
Babu Owino amekuwa maarufu kwa kutumia mitandao ya kijamii kufikia vijana, na sasa anasema ataenda hatua moja zaidi: kutoka kwa keyboard hadi mahakama.
“Mimi ni wakili aliyesajiliwa. Sina sababu ya kukaa kimya huku vijana wetu wananyanyaswa. Nitakuwa sauti yao mahakamani. Nitahakikisha hawanyamazwi,” aliongeza.
Aidha, alikemea kile alichokitaja kama ukosefu wa haki katika mfumo wa sheria, akisema kuwa idadi kubwa ya Wakenya masikini wamekuwa wahanga wa kushindwa kupata utetezi wa kisheria kwa sababu ya umasikini.
“Wakati mwingine mtu anakamatwa kwa kosa dogo, kama kuwa na bangi au kuandamana, kisha anawekwa rumande kwa miezi kwa kuwa hana wakili. Huu ni unyama. Uongozi haupaswi kukaa kimya.”
Babu pia aliwasihi mawakili wengine kuungana naye katika harakati za kuwasaidia raia bila kutoza fedha, akisema kuwa huduma ya sheria haipaswi kuwa anasa ya matajiri pekee.
“Tunahitaji mapinduzi ya haki. Tusikubali tena hali ambapo haki ni ya wenye pesa tu. Mimi nitaanzisha mwamko huu. Nawakaribisha mawakili wote wenye dhamira njema kujiunga nami.”
© Radio Jambo 2024. All rights reserved