NAIROBI, KENYA, Agosti 3, 2025 — Edwin Sifuna ameapa kuondoka kwenye chama cha ODM iwapo kitaamua kumuunga mkono Rais William Ruto katika uchaguzi mkuu wa 2027.
Katibu Mkuu wa Chama cha Orange Democratic Movement (ODM), Edwin Sifuna, ametangaza kuwa hatabaki katika chama hicho endapo kitaamua kumuunga mkono Rais William Ruto katika azma yake ya kuchaguliwa tena mwaka wa 2027.
Akihutubia mkutano wa kisiasa katika eneo la Sabaoti, Kaunti ya Trans Nzoia siku ya Jumapili, Sifuna alisema kuwa uaminifu wa chama haupaswi kuzidi misimamo ya mtu binafsi kuhusu masuala muhimu kama ya kumuidhinisha mgombea urais.
“Sikilizeni wafuasi wa ODM, msimamo wangu haujabadilika,” alisema Sifuna.
“Raila mwenyewe amesema kuwa chama hiki ni cha kidemokrasia na kila mwanachama ana uhuru wa kutoa maoni yake.
"Lakini wahuni fulani wanasema siwezi kuwa na msimamo tofauti kwa sababu mimi ni Katibu Mkuu—kwamba ninawakilisha chama kila wakati,” aliongeza akimrejelea kiongozi wa ODM, Raila Odinga.
Sifuna: Sitaisoma Taarifa ya Kumuunga Mkono Ruto
Sifuna aliendelea kueleza kuwa hata kama ODM itaamua kutoa taarifa ya kumuunga mkono Rais Ruto, yeye binafsi hatakuwa tayari kusoma taarifa hiyo.
“Niko tayari kusoma taarifa yoyote ile itakayotolewa na ODM, hata kama wataniita majina mabaya. Lakini siku chama kitaamua kumuunga mkono Ruto mwaka 2027, hiyo taarifa sitaisoma,” alisema Sifuna.
Aliongeza kwa kejeli, “Wengine wanasema [Mbunge wa Nyando] Jared Okelo anazungumza Kiingereza kizuri kuliko mimi. Basi Okelo ujitayarishe kuchukua nafasi yangu. Iwapo chama kitasimama na Ruto, mimi sitakuwa sehemu ya hilo.”
ODM Yapoteza Mwelekeo, Asema Sifuna
Sifuna pia alikiri wazi kuwa ODM imekosa kuweka mambo yake sawa na kwamba sasa chama hicho hakina msimamo wa wazi kuhusu masuala muhimu ya kitaifa. Analaumu hali hiyo kwa kile alichokiita "mkataba wa serikali pana," uliounganisha baadhi ya viongozi wa upinzani na serikali ya UDA.
Anasema kuwa ODM haizungumzi tena kwa sauti moja, hali inayowaacha wanachama na wafuasi wake katika hali ya sintofahamu.
Wito wa Kujiuzulu, Lakini Raila Amtetea
Baadhi ya wafuasi wa ODM wamemkosoa Sifuna vikali na hata kutaka ajiuzulu. Hata hivyo, Raila Odinga amemtetea Katibu Mkuu huyo kwa kusema kuwa licha ya kuwa msemaji rasmi wa chama, ana haki pia ya kutoa maoni yake binafsi.
“Wakati mwingine tunaweza kuwa na tofauti ya maoni, lakini hiyo haimaanishi kwamba mtu hana nafasi katika chama chetu,” alisema Raila mapema mwezi huu.
© Radio Jambo 2024. All rights reserved