NAIROBI, KENYA, Jumatamo, Novemba 12, 2025 – Mchungaji Victor Kanyari amekiri kwamba bado alikuwa na mapenzi ya dhati kwa mwimbaji wa injili marehemu Betty Bayo, miaka mingi baada ya kuachana.
Akizungumza katika kikao cha waandishi wa habari Jumatano, Novemba 12, 2025, Kanyari alisema hakupendezwa na maneno yanayoenezwa mitandaoni kuhusu huzuni yake.
“Niliamua kuita kikao cha wanahabari kwa sababu ya maneno mengi yanayosemwa mtandaoni ambayo hayapendezi. Betty Bayo alikuwa kila kitu kwangu. Ningetafuta mabilioni kama ingehitajika ili tu aendelee kuishi,” alisema Kanyari kwa huzuni.
“Sijawahi kumsahau hata baada ya kutengana”
Kanyari alisema Betty Bayo alibaki kuwa sehemu muhimu ya maisha yake hata baada ya kuachana miaka kadhaa iliyopita.
“Watu wanauliza kwa nini Kanyari analia kupita wote. Nitawaambia, Betty alinipa watoto wawili. Kama angenichukia, asingewazaa. Alinipenda kwa moyo wake wote,” alisema.
Aliongeza kuwa alipenda sana familia yake, hasa watoto wake.
“Ikiwa unataka kuthibitisha kwamba nilimpenda Betty, angalia shule ambazo watoto wanasoma. Nimewaandikisha katika shule za kimataifa. Sijawahi kuoa tena kwa sababu nampenda mama yao na nawapenda watoto wangu,” alisema.
“Moyo wangu unavuja damu”
Kanyari alionekana kugubikwa na majonzi mazito, akisema hajawahi kupona kutokana na kifo cha Betty.
“Moyo wangu unavuja damu. Kwa utamaduni wetu hatuzungumzi vibaya kuhusu marehemu. Inaniuma kusikia watu wakizungumza vibaya kuhusu Betty, ambaye aliimba nyimbo zilizawasaidia watu wengi kumjua Mungu,” alisema.
“Namheshimu mume wake mpya”
Kanyari pia alifunguka kuhusu uhusiano wake na Hiram Gitau ‘Tash’, mume wa marehemu Betty, akisema hana chuki naye.
“Betty ndiye aliyetutambulisha mimi na Tash, na ninampenda na kumheshimu. Sina lolote dhidi yake. Tumekuwa tukiheshimiana na kushirikiana vizuri, na ninamshukuru kwa jinsi anavyowatunza watoto wangu,” alisema Kanyari.
Kanyari aliongeza kuwa mara nyingi wamekutana na kuzungumza kwa amani. “Ni binti yangu Sky aliyenitambulisha kwake. Aliniambia, ‘Njoo umsalimie baba,’ nami nikafanya hivyo kwa furaha,” alisema.
“Sitaendelea kuhudhuria mikutano pamoja naye”
Kanyari alisema ameamua kuacha kuhudhuria mikutano ya pamoja na Tash baada ya watu kuanza kusema anataka umaarufu.
“Watu wanasema ninaiba uangalizi, kwa hivyo nimeamua kufanya mikutano yangu mwenyewe kanisani kwangu. Sitaki tena maneno ya watu,” alisema.
Huzuni ya familia na mashabiki
Kifo cha Betty Bayo kimezua majonzi makubwa miongoni mwa wapenzi wa muziki wa injili, wakimkumbuka kama mwanamke mwenye sauti ya upole na moyo wa kutoa.
Mashabiki wengi mitandaoni walimtaja kama “malaika wa nyimbo za wokovu” huku wakisifia ujasiri wa Kanyari kwa kuonyesha upendo wa kweli licha ya tofauti zao za zamani.
Kanyari: “Sitamsahau milele”
Akihitimisha mazungumzo yake, Kanyari alisema ataendelea kumkumbuka Betty Bayo milele.
“Sitamsahau kamwe. Betty alinipa sababu ya kuamini katika upendo wa kweli. Alikuwa sehemu ya maisha yangu na ataendelea kuwa moyoni mwangu,” alisema kwa sauti ya chini.
© Radio Jambo 2024. All rights reserved