Elon Musk kuongoza idara ya ufanisi wa serikali katika uongozi wa Donald Trump

Rais mteulewa Marekani Donald Trump ameendelea kufanya uteuzi wa wafanyakazi katika serikali yake anaolenga kufanya nao kazi baada ya kuapishwa Januari mwakani.

Kupitia ujumbe kwa vyombo vya habari, Trump amemchagua mfadhili wake mkuu wa kampeni ambaye pia ni mmiliki wa mtandao wa X Elon Musk kuongoza idara ya ufanisi wa serikali ya Marekani D.O.G.E.

Elon Musk katika nafasi aliyopewa na rais Donald Trump atashirikiana na Vivek Ramasway katika kutekeleza majukumu yao katika kipindi cha muhula wa uongozi wa Trump.

Kwa mujibu wa Trump, amefananisha uteuzi wa wawili hao na “The Manhattan Project” akisema usimamizi wao utasaidia kupunguza vikwazo vingi, kupunguza matumizi mabaya ya rasilimali  pamoja na kuchagiza na kufanyia marekebisho mashirika mbali mbali ya serikali.

Mmiliki wa X Elon Musk akikubali kuchukua nafasi hiyo amesema kuwa uteuzi wake utatikisa sekta mbalimbali za serikali ya Marekani pamoja na mtu yeyote anayehusika na utumizi mbaya wa serikali ya Marekani.

Uteuzi wa Musk na Vivek ni wa hivi punde kufanywa na Donald Trump ukijiri siku chache baada ya rais huyo mteule kumteua Sussie Wiles aliyekuwa mkuu wa kampeni zake katika chaguzi za awali kuchukua nafasi ya mkuu wa utumishi katika ikulu ya White House.

Trump ameonekana kuwachagua wandani wake wa karibu kama vile Sussie Wiles na Musk ambao wamekuwa sehemu muhimu kwenye kampeni zake za kumfikisha ikulu ya White House.

Taarifa za vyombo vya habari nchini Marekani zimeripoti kuwa Elon Musk alifadhili kampeni ya Trump kwa zaidi ya Dola milioni mia mbili katika uchaguzi uliofanywa Novemba 5, 2024.