Leslie Richer, mkurugenzi wa habari na mawasiliano wa Umoja wa Afrika (AU), akizungumza katika Mkutano wa Ushirikiano wa China na Afrika wa Jukwaa la Vyombo vya Habari na Taasisi za Utafiti za Global South uliofanyika Johannesburg, Afrika Kusini, Novemba 13–14. /XINHUA
Kupitia ushirikiano na China na washirika wengine wa Global South, Afrika sasa inaweza kutumia majukwaa ya pande nyingi kama vile Kundi la Ishirini (G20) kuhakikisha kuwa sauti za Afrika zinasikika na maslahi yake yanaeleweka wazi, amesema Leslie Richer, mkurugenzi wa habari na mawasiliano wa Umoja wa Afrika (AU).
Alitoa kauli hizo katika mahojiano na Xinhua pembezoni mwa Mkutano wa Ushirikiano wa China na Afrika wa Jukwaa la Vyombo vya Habari na Taasisi za Utafiti za Global South uliofanyika Johannesburg, Afrika Kusini, Novemba 13–14.
VYOMBO VYA HABARI, TAASISI ZA UTAFITI ZINA JUKUMU MUHIMU
Katika ushirikiano wa mataifa ya Afrika na nchi nyingine za Global South, vyombo vya habari vina jukumu muhimu katika kuhakikisha uelewano kati ya watu, huku taasisi za utafiti zikitoa msingi wa majadiliano ya sera, hasa kati ya Afrika na China, alisema afisa huyo wa AU.
Alisema kuwa vyombo vya habari na taasisi za utafiti vinapounganishwa, nguvu kubwa inaweza kupatikana inayowaleta pamoja watafiti, wanataaluma na wanahabari, pamoja na watunga sera, ili “kukuza uelewa wa kile tunachotaka kufanya katika masuala ya maendeleo,” Richer alibainisha.
Alisema Mkutano wa Ushirikiano wa China na Afrika wa Jukwaa la Vyombo vya Habari na Taasisi za Utafiti za Global South, ulioandaliwa kwa pamoja na Shirika la Habari la Xinhua, AU na Independent Media ya Afrika Kusini miongoni mwa washirika wengine, ulifanyika katika wakati muhimu huku mandhari ya dunia ikibadilika.
Kwa mujibu wa afisa huyo wa AU, mpangilio wa dunia uko katika kipindi cha mpito huku vituo vya shughuli za kiuchumi vikijitokeza kote Global South, na mahitaji ya uwakilishi wa haki zaidi katika masuala ya maendeleo na utawala wa dunia unaoakisi uhalisia wa karne ya 21 yakiongezeka.
Mkutano wa Ushirikiano wa China na Afrika wa Jukwaa la Vyombo vya Habari na Taasisi za Utafiti za Global South uliofanyika Johannesburg, Afrika Kusini, Novemba 13–14. /XINHUA
Kwa maoni yake, simulizi zinazosambaa duniani kuhusu nchi na watu wa Afrika mara nyingi hutengenezwa kwingineko, na kuchujwa kupitia mitazamo isiyoakisi uhalisia wa bara hilo. Simulizi hizo zinaweza kupotosha uelewa na kupunguza uwezekano wa ushirikiano wa kweli.
“Global South lazima iwe washirika si tu katika biashara, miundombinu na diplomasia, bali pia katika kusimulia hadithi. Lazima tukuze simulizi zenye uwiano zinazoakisi heshima, utofauti na uhai wa watu wetu kupitia mabadilishano ya watu kwa watu na ya taasisi, ili maarifa yatembee pande zote mbili na kuleta jamii zetu karibu zaidi,” Richer alisema.
GLOBAL SOUTH INAPASWA KUWAKILISHWA NA KUSIKIKA ZAIDI
Mkutano wa Viongozi wa G20 unatarajiwa kufanyika Novemba 22 na 23 mjini Johannesburg. AU ilialikwa kujiunga na G20 Septemba 2023. China ilikuwa nchi ya kwanza kueleza wazi uungaji mkono wake kwa uanachama wa AU katika G20, sambamba na kuunga mkono jukumu kubwa la AU katika utawala wa dunia.
Richer alisisitiza kuwa kujumuishwa kwa Afrika kupitia AU katika G20 si ishara tu, bali ni hatua muhimu katika kuhakikisha Afrika inapata uwakilishi bora zaidi katika ulimwengu wa leo wa pande nyingi. Mbali na G20, mifumo mingine ya ushirikiano, ikiwemo Jukwaa la Ushirikiano wa China na Afrika, inaiwezesha Afrika kusikika katika jukwaa la kimataifa.
“Sasa tupo ndani ya vyumba vya maamuzi, lakini si suala la kuwapo tu. Ni kuhusu kuathiri maamuzi yanayofanywa ndani ya G20,” alisisitiza afisa huyo wa AU.
Leslie Richer, mkurugenzi wa habari na mawasiliano wa Umoja wa Afrika (AU), akizungumza pembezoni mwa Mkutano wa Ushirikiano wa China na Afrika wa Jukwaa la Vyombo vya Habari na Taasisi za Utafiti za Global South uliofanyika Johannesburg, Afrika Kusini, Novemba 13–14. /XINHUA
Kupitia ushirikiano na China na washirika wengine wa Global South, Afrika sasa inaweza kuanza kutumia majukwaa haya ya pande nyingi kuhakikisha kuwa sauti za Afrika zinasikika na maslahi yake yanaeleweka wazi, alisema.
Kwa mujibu wake, hili linasaidia kuimarisha uwakilishi wa Global South katika maeneo ya pande nyingi.
Akizungumza kuhusu mageuzi ya utawala wa dunia, alisema kuwa taasisi nyingi za kimataifa zilizopo zilianzishwa wakati ambapo nchi nyingi za Global South hazikuwa huru. “Na hata zilipopata uhuru, hazikuwakilishwa ipasavyo katika miundo hii ya utawala.”
Akirejea taasisi nyingi za kifedha za dunia, alisema kuwa kanuni zao za uendeshaji hazikuundwa kwa manufaa ya nchi zinazoendelea, bali zinakwamisha maendeleo yao kwa sababu “hazikubuniwa kwa kuzingatia maslahi yetu.”
Richer alitoa wito wa kujenga dunia iliyo jumuishi zaidi, yenye usawa na amani, ambako maendeleo ni haki badala ya fursa. Aliongeza kuwa hatima ya mataifa haipaswi kuamuliwa na ukosefu wa usawa wa kihistoria, bali na ushirikiano na maendeleo ya pamoja.