Picha hii iliyopigwa Juni 9, 2026, inaonyesha watu wakihudhuria Kongamano la Pili la Dunia la Taaluma za Kale mjini Athens, Ugiriki. Kongamano hilo liliwashirikisha zaidi ya watu 200 mjini Athens siku ya Jumanne, huku mijadala ikijikita katika masuala yanayohusu ustaarabu wa kale, pamoja na kuimarisha ubadilishanaji wa kitaaluma na kujenga mwafaka katika tafiti za kimataifa za taaluma za kale. (Xinhua/Marios Lolos)
Zaidi ya washiriki 200 walihudhuria Kongamano la Pili la Dunia la Taaluma za Kale mjini Athens, Ugiriki, Jumanne, huku mijadala ikijikita katika masuala yanayohusu ustaarabu wa kale, pamoja na kuimarisha ubadilishanaji wa kitaaluma na kujenga mwafaka katika tafiti za kimataifa za taaluma za kale.
Kongamano hilo la siku mbili, lenye kaulimbiu "Mazungumzo Kati ya Kale na Kisasa: Msukumo wa Kisasa Kutokana na Hekima za Klasiki," limewakutanisha maafisa kutoka taasisi mbalimbali za China na Ugiriki, wataalamu na wasomi wa taaluma za kale na nyanja zinazohusiana nazo kutoka duniani kote, pamoja na wanadiplomasia na wawakilishi wa vyombo vya habari walioko nchini Ugiriki.
Washiriki wa kongamano hilo walibainisha kuwa taasisi za kitaaluma, ikiwemo Shule ya China ya Taaluma za Kale iliyopo Athens, zimetumia nguvu na uwezo wake wa kipekee kuendeleza maendeleo ya taaluma za kale, na hivyo kuchangia kujifunza kwa pamoja kati ya ustaarabu mbalimbali na kuimarisha ubadilishanaji wa tamaduni.
Washiriki wengi walisema kuwa ustaarabu wa kale, kutokana na urithi wake mkubwa wa kibinadamu na hekima zake zisizopitwa na wakati, kwa muda mrefu umekuwa ukitoa msukumo wa kiakili na kuimarisha maendeleo ya jamii za binadamu, huku pia ukiwa nguvu muhimu inayochochea ustawi na maendeleo ya mataifa.
Walikubaliana kuwa kuimarisha tafiti za taaluma za kale na kuendeleza mazungumzo kati ya ustaarabu mbalimbali katika nyakati na maeneo tofauti ni hitaji muhimu katika kuhifadhi utofauti wa tamaduni na kukuza ubadilishanaji na kujifunza kwa pamoja kati ya ustaarabu. Aidha, ni njia isiyoweza kuepukika ya kuhuisha na kuendeleza ustaarabu sambamba na mabadiliko ya nyakati.
Washiriki hao walisisitiza umuhimu wa kuzingatia maendeleo ya jumla ya mtu binafsi kwa kutumia hekima za kale kukuza maadili ya wananchi; kuzingatia ustawi na maendeleo ya mataifa kwa kutumia hekima hizo kuimarisha misingi ya kiroho ya mchakato wa kisasa wa maendeleo; na kuzingatia maelewano na kuishi pamoja duniani kwa kutumia hekima za kale kukabiliana na changamoto za kimataifa, kulinda kwa pamoja amani na ustawi, na kushirikiana kujenga mustakabali bora zaidi.
Wakati wa kongamano hilo, vikao maalum vitafanyika vikijadili mada mbalimbali ikiwemo “Maadili na Elimu,” “Urafiki na Jamii,” “Amani na Utaratibu,” pamoja na “Teknolojia na Ustaarabu.” Aidha, kutakuwa na shughuli mbalimbali za kubadilishana tamaduni.
Tangu kufanyika kwa Kongamano la kwanza la Dunia la Taaluma za Kale mjini Beijing mnamo Novemba 2024, idara na taasisi mbalimbali za China na Ugiriki zimekuwa zikifanya kazi kwa karibu kutekeleza makubaliano yaliyofikiwa katika kongamano hilo na kujenga mitandao ya kuimarisha ubadilishanaji na mazungumzo katika taaluma za kale.
Picha iliyopigwa Juni 9, 2026, inaonyesha washiriki wakihudhuria Kongamano la Pili la Dunia la Taaluma za Kale mjini Athens, Ugiriki. Kongamano hilo liliwakutanisha zaidi ya washiriki 200 kujadili masuala yanayohusu ustaarabu wa kale na kuimarisha ushirikiano wa kitaaluma katika tafiti za kimataifa za taaluma za kale.(Xinhua/Marios Lolos)
