Sitaruhusu kuhangaishwa kwa raia wakati vwa kukusanya ushuru - Ruto aonya KRA

Rais William Ruto ameitaka Mamlaka ya Ushuru nchini (KRA) kukumbatia weledi inapotekeleza majukumu yake.

Alisema wananchi wanapaswa kutendewa kwa heshima na staha wakati wa kukusanya kodi badala ya kuwanyanyasa.

Akiongea katika hoteli ya Sarova Whitesands mjini Mombasa siku ya Ijumaa, wakati wa Siku ya Walipa Ushuru 2023, Ruto alisema Serikali haitafurahia kunyanyaswa na maafisa wa KRA wanapotoza ushuru.

"Nachukua fursa hii kusisitiza kwa KRA kwamba inawezekana kuwa na adabu, fadhili na upole kwa walipa ushuru na wakati huo huo kuwa  na ufanisi zaidi katika ukusanyaji wa ushuru," alisema.

Wakati uo huo, Rais Ruto alisema Baraza la Mawaziri limeidhinisha Mswada wa Ukaguzi wa Umma (Marekebisho) wa 2023, ambao utaimarisha uhuru na uwazi wa Mkaguzi Mkuu wa Hesabu ili kuhakikisha matumizi sahihi ya rasilimali za umma kupitia ukaguzi na pia kutoa uwezo wa uchunguzi wa ulaghai.

"Ni muhimu kama Serikali, tuwasilishe ahadi hii kwa uwazi kwa sababu wananchi na walipakodi wanastahili kuijua kama jambo la haki," alisema.

Alisema walipakodi nchini wanaunga mkono mabadiliko ya kitaifa kwa kufadhili utoaji wa huduma za umma, uwekezaji wa kimkakati na uhuru wa mapato ya kitaifa.

Rais Ruto alisema Serikali itaendelea kurekebisha KRA ili kuimarisha utoaji wa huduma na kuondoa ufisadi.

Alitaja mabadiliko ya kidijitali na utamaduni katika ukusanyaji wa kodi kuwa ni baadhi ya mipango inayofanywa ili kuboresha utoaji wa huduma katika wakala wa ukusanyaji wa mapato ya taifa.

"Nilitangaza katika Siku ya Kitaifa ya Walipa Ushuru iliyopita, kwamba wakati umefika kwa KRA kufanya mabadiliko ya kitamaduni ili kuifanya iwiane na matakwa ya kukusanya mapato ya utawala mpya wa kikatiba, jukwaa la uongozi, hali halisi ya kimkakati na hali ya kiuchumi," alisema. Rais Ruto.

Alibainisha kuwa zama za wakala wa kibabe kuwaingiza walipakodi kwenye ugaidi kutokana na unyanyasaji wa jeuri na ubabe wa mamlaka ya kisheria kwa jina la ukusanyaji wa mapato zimepita.

"Kwa hivyo KRA lazima ionyeshe kujitolea kwa pekee kwa maadili mapya yanayozingatia huduma na kuashiria kuachana na matumizi mabaya na kupita kiasi ya nyakati zilizopita, ambayo yalisaidia tu kuibua chuki na kuhimiza ukwepaji huku kikiwezesha upotevu, wizi, ubadhirifu na vitendo vingine vya ufisadi," Alisema Ruto.

Ruto alisema utekelezwaji wa mfumo wa utambulisho wa kitaifa wa kitambulisho cha kidijitali, pia utasaidia pakubwa katika kuwezesha ukusanyaji wa data husika kwa ajili ya kukusanya mapato.

"Ninatambua wajibu mkuu wa serikali wa kutumia mapato yote kwa uangalifu na ipasavyo katika kuwahudumia raia wetu. Ahadi hii ni thabiti na tumejitolea kufanya hivyo kwa uwazi na uwajibikaji wa hali ya juu," alisema Rais Ruto.

Naibu Rais Rigathi Gachagua aliwahakikishia Wakenya kuwa mapato yote yanayokusanywa yanatumiwa kwa busara.

"Ninataka kuwahakikishia Wakenya kwamba ushuru wanaolipa unatumika kwa malengo yaliyokusudiwa. Tutakabiliana na yeyote atakayefuja pesa hizo," alisema Gachagua.

Waziri wa Fedha Njuguna Ndung'u alipuuzilia mbali madai kwamba kulikuwa na ushuru mpya wa ziada wa bidhaa za kibinafsi.

Alisema sheria iko wazi kuhusu ongezeko la kodi, akisema wanafanya kazi chini ya mwongozo wa Muswada wa Sheria ya Fedha.

Kiongozi wa Wengi katika Bunge la Kitaifa Kimani Ichung'wa na Mwenyekiti wa Kamati ya Fedha Kimani Kuria walisema utoaji wa huduma bora katika KRA ni muhimu katika ukusanyaji wa ushuru wa kutosha kufadhili miradi ya maendeleo nchini.