IPOA yaanzisha uchunguzi kuhusu kutekwa nyara kwa Gaitho, kupigwa risasi kwa mwanahabari Nakuru

Mamlaka Huru ya Uangalizi wa Polisi (IPOA) imeshughulikia kesi ya mwanahabari mkongwe Macharia Gaitho ambaye alitekwa nyara ndani ya kituo cha polisi cha Karen kabla ya kuachiliwa kwake.

Gaitho alitekwa nyara na polisi kabla ya baadaye kufafanua kuwa utekaji nyara huo ulikuwa kisa cha utambulisho kimakosa.

IPOA mnamo Jumatano, Julai 17, 2024, iliwakaribisha Gaitho, wakili wake Danstan Omari na wanahabari wengine walipokuwa wakipokea malalamishi kuhusu utekaji nyara uliotekelezwa na Kurugenzi ya Upelelezi wa Jinai (DCI).

“IPOA leo mchana imepokea mwanahabari Macharia Gaitho, wakili wake Danstan Omari, Chama cha Wahariri wa Kenya na Muungano wa Wanahabari Kenya.

"Hii inafuatia kukamatwa kwa Bw Gaitho huko Karen asubuhi ya leo, katika kile Huduma ya Kitaifa ya Polisi ilidai baadaye kuwa ni kisa cha utambulisho kimakosa," IPOA ilisema kwenye taarifa.

"Kesi ya Bw Gaitho imechukuliwa na IPOA, na Mamlaka tayari ilikuwa imetuma maafisa katika kituo cha Polisi cha Karen baada ya video za kukamatwa kwa Bw Gaitho kusambazwa kwenye mitandao ya kijamii," taarifa hiyo iliongeza.

Mwanahabari huyo mkongwe aliachiliwa muda mfupi baada ya kutekwa nyara ndani ya kituo cha polisi cha Karen.

Binti ya mwanahabari huyo Anita Gaitho alisema babake alikasirishwa na watekaji nyara ambao walikataa kujitambulisha na kumpeleka ndani ya Toyota Probox nambari ya usajili KBC 725 J.

"Niko na baba yangu @MachariaGaitho. Amefikishwa tu katika kituo cha polisi cha Karen na gari lililomteka nyara. Yuko salama ingawa walimsumbua kidogo. Tunatoa ripoti ya utekaji nyara sasa hivi," Anita alisema katika taarifa kwenye X mnamo Jumatano, Julai 17, 2024.