Mbunge Babu Owino adokeza kuhusu mipango mikubwa na Ndindi Nyoro

Mbunge wa Embakasi Mashariki Paul Ongili almaarufu Babu Owino amedokeza kuhusu malengo makubwa ya kisiasa.

Siku ya Jumatano asubuhi, mwanasiasa huyo kijana alichapisha picha yake na Mbunge wa Kiharu Ndindi Nyoro ambaye aliashiria kuwa anafanya kazi naye.

Katika sehemu ya maelezo ya picha hiyo, aliwataka Wakenya kuwafuata kuelekea siku zijazo akibainisha kuwa wana mambo makubwa yanakuja.

"Usidanganywe, hapa ndipo mustakabali ulipo. Wakenya wote wanashauriwa kuwafuata wawili hawa. Tutakuwepo bila kujali. Mambo makubwa yanakuja,” Babu Owino aliandika.

Chapisho hilo limeonekana kudokeza kuhusu Babu Owino na Ndindi Nyoro kulenga kiti cha juu zaidi katika siasa za Kenya. Kwa sasa wanahudumu bungeni wanakiwakilisha Embakasi Mashariki na Kiharu mtawalia.

Wanasiasa hao wawili ambao mara nyingi huonekana kama uwakilishi wa vijana bungeni walikuwa miongoni mwa wabunge walioonekana kujitenga kabisa na kutimuliwa kwa Rigathi Gachagua kama naibu wa rais. Wote wawili hawakuwapo bungeni wakati DP huyo wa zamani alikuwa akiondolewa madarakani.

Mnamo Juni mwaka huu, Babu Owino aliwaonya wanasiasa wakongwe wasitarajie kuheshimiwa ikiwa hawatawaheshimu wanasiasa vijana.

Akitoa mfano wa biblia, Babu alisema viongozi vijana hawapaswi kudharauliwa kutokana na umri wao.

“Tunamheshimu wanasiasa wakongwe ambao wako juu yetu kisiasa. Lakini wakongwe lazima watuheshimu kwa sababu sisi pia tulichaguliwa na wananchi,” alisema.

Mbunge huyo aliongeza kuwa wakati Wakenya walipokuwa wakiwachagua wabunge vijana, hawakuwaona kama watoto.

"Mtu ambaye ana watoto watatu na ana nia ya kuwa na watano ni mtoto huyo?. Katikati, Ndindi Nyoro ananyanyaswa, hapa ni Babu Owino. Unataka tufanye nini,” aliweka pozi.

Alishikilia kuwa watawaheshimu viongozi ambao ni wakubwa kwao ikiwa pia wana mtazamo sawa kwao.

“Ukileta amani, tutaleta amani. Ukileta vita, tutamwomba Mungu akuadhibu,” aliongeza.