Rais William Ruto awashauri vijana kutodhalilisha nchi badala yake wawe wazalendo

Rais William Ruto amewahimiza vijana wa Kenya kuwa wazalendo na wasikubali mtu kulidharau taifa lao.

Akizungumza katika eneo la Manyani kaunti ya Taita Taveta katika hafla ya kufuzu kwa maafisa wa huduma ya wanyamapori katika chuo cha kutekeleza sheria cha huduma ya wanyamapori nchini, Ruto alisema kuwa Kenya ni nyumbani kwa wote na ni jukumu la kila mmoja kuilinda kwa ushirikiano .

Ruto aliwahimiza vijana  kuwa wazalendo  kila wakati na kuliweka taifa mbele akieleza kuwa ni jukumu la vijana kulinda nchi na kutoruhusu wachache  wenye nia mbaya kuharibu jina la taifa.

‘’Lazima tujue kwanza kama Wakenya wazalendo kuwa  lazima tusimame, tuitetee na tuilinde nchi yetu. Tusikubali watu wenye nia hasi kuharibu, kudhalilisha na kusambaza ujumbe mbaya kuhusu nchi yetu. Kenya ni kwetu na lazima tuilinde pamoja nawaomba  vijana wetu kuelewa kuwa huwezi dhalalisha nchi yako ya mama. Lazima tuinuke na tuitetee Kenya,’’ Alisema Ruto.

Kiongozi huyo wa taifa aliongeza kuwa anafurahia nchi ya Kenya kuwa  na vijana ambao wako radhi kusimama na kuilinda nchi yao kwa  liwe liwalo. Aliwahimiza wazazi wa maafisa  waliofuzu kuwapatia usaidizi wanaohitaji ili kufauli katika jukumu lao  kama maafisa kwenye idara ya wanyamapori nchini.

Rais alisistiza kuwa serikali ya Kenya Kwanza anayoongoza itaunga mkono maafisa hao katika juhudi zao ya kulinda urithi wa taifa.

‘’Nimefurahi sana kwamba tuko na wananchi wazalendo. Wanaume na wanawake ambao wamepata mafunzo na wako tayari wakiwa na nguvu nyingi na kwa uzalendo kuilinda nchi yetu na kuhifadhi pori zetu. Nitawaunga mkono pamoja na serikali yangu ili kuhakikisha kuwa mnatimiza wajibu wenyu na kuhakikisha kuwa mnapata raslimali na vifaa ili  mtekeleze wajibu wenyu na mtumikie nchi tunayoipenda sote; nchi yetu ya Kenya."  Alisema Rais.