Omanga asifu ufasaha wa Raila katika Mjadala Afrika, awataka wapinzani kujiondoa ili kuepuka aibu

Aliyekuwa seneta wa kuteuliwa Millicent Omanga amempongeza aliyekuwa Waziri Mkuu Raila Odinga kwa jinsi alivyojiendeleza kwa ubora wakati wa mjadala wa Mjadala Afrika uliofanyika Addis Ababa, Ethiopia, Ijumaa, Desemba 13, 2024.

Mjadala huo ambao uliwashirikisha wagombea wanaowania uenyekiti wa Tume ya Umoja wa Afrika (AUC) ulipeperushwa barani kote kwa lugha sita.

Katika taarifa yake, Omanga alimpongeza Raila kwa ufasaha wake na utulivu, akibainisha kuwa majibu yake yalionyesha uelewa wake wa kina wa jukumu hilo.

“Mhe. Raila Odinga amedhihirisha bara zima kwa nini yeye ndiye bora katika kinyang'anyiro hiki cha uenyekiti wa AUC. Ufasaha na urahisi wa kuvutia ambao alijibu maswali ni dhibitisho wazi kwamba anaelewa kazi hiyo vyema,” Omanga alisema.

Omanga pia alikiri kuwa wapinzani wa Raila pia walifanya vyema lakini akaelezea imani yake katika ubora wa waziri mkuu huyo wa zamani katika kinyang'anyiro hicho akisema kuwa wapinzani wake watalazimika kujitoa ili kutoshindwa.

"Wapinzani wake pia walifanya vizuri, lakini katika mbio hizi, hawana chaguo ila kujiondoa ama kushindwa! Si utani,” Omanga alisema.

Raila wakati wa mdahalo huo alisema huo utahakikisha uwakilishi wa haki wa bara la Afrika kwa baraza la usalama.

Alisema chini ya uongozi wake, uwakilishi wa kudumu kwa Afrika, ulio na mamlaka ya kura ya turufu, ni jambo la lazima.

Alilalamika kuwa Afrika, yenye mataifa huru 55, haina viti vyovyote ilhali Ulaya ina viti vitatu.

“Sitazungumzia uwakilishi wa kudumu. Iwapo wakuu wa nchi wataona inafaa niongoze hili, nitashirikiana na uongozi wote wa bara hili kuhakikisha tunapata haki ya kimataifa,” alisema.

Hata hivyo, alihusisha kuendelea kwa uwakilishi mdogo wa Afrika na ukweli kwamba UNSC iliundwa wakati sehemu nyingi za Afrika zilikuwa makoloni.

Raila alisema haikubaliki kuwa Afrika yenye watu bilioni 1.4 haina uwakilishi katika baraza hilo.