Wanne washtakiwa kwa jaribio la kusafirisha mchwa adimu wa thamani ya zaidi ya milioni kutoka Kenya

Wanaume wanne—Wabelgiji wawili, Mvietnamu mmoja na Mkenya—wanatarajiwa kusomewa hukumu leo Jumanne, Aprili 15, 2025, baada ya kukiri kujaribu kusafirisha mamia ya mchwa adimu kutoka Kenya.

Shirika la Huduma za Wanyamapori Kenya (KWS) lilitaja kesi hii kuwa ya kihistoria, ikielezea kama hatua kubwa katika juhudi za kulinda viumbe hai nchini. Hii ndiyo mara ya kwanza kwa Kenya kukabiliana na kesi ya usafirishaji haramu wa mchwa kwa kiwango kikubwa.

Mchwa waliolengwa ni aina ya Messor cephalotes, ambao wanaweza kukua hadi milimita 20, huku malkia wao wakifikia milimita 25. Wana sifa ya kuvutia wakusanyaji wa wanyama wa kufugwa barani Ulaya na Asia.

KWS ilisema kila mchwa anaweza kuuzwa hadi £170 au $220, sawa na takriban KSh 28,478 na KSh 28,479 kwa viwango vya ubadilishaji vilivyotumika kufikia Aprili 14, 2025. Kwa mamia ya mchwa waliokamatwa, thamani ya mzigo huo inaweza kufika mamilioni ya shilingi.

Washukiwa walikuwa wameficha mchwa ndani ya mirija maalum ya sindano na majaribio iliyojazwa pamba ili kuwahifadhi hai hadi kwa miezi miwili. KWS ilifichua kwamba kulikuwa na juhudi za makusudi za kuzuia kugundulika kwa maudhui ya mirija hiyo.

Picha zilizoonyeshwa na KWS zinaonyesha mirija mingi midogo, kila moja ikiwa na mchwa wawili au watatu.

Msemaji wa KWS, Paul Udoto, alisema operesheni ya kuwanasa washukiwa ilikuwa ya kijasusi na ilihusisha ufuatiliaji wa karibu. “Hii ni ishara kuwa walanguzi wanahamia kwa viumbe wadogo ambao pia ni muhimu kwa mazingira yetu,” aliambia BBC.

Kulingana na mikataba ya kimataifa ya bayoanuwai, mchwa hawa wanalindwa na hairuhusiwi kuwasafirisha bila vibali maalum.

KWS ilisisitiza kuwa kesi hii ni onyo kwa walanguzi na inathibitisha nia ya Kenya kulinda viumbe wote—wakubwa kwa wadogo.

“Mashtaka haya yanatuma ujumbe mzito kuwa Kenya haitalegeza kamba katika utekelezaji wa sheria za uhifadhi,” KWS ilisema.