Waendesha Bodaboda Nairobi Wapinga Maandamano ya Gen Z

Waendesha bodaboda jijini Nairobi wamechukua msimamo mkali dhidi ya maandamano yaliyopangwa kufanyika Juni 25.

Katika taarifa iliyotolewa Ijumaa, Juni 20, 2025, Bodaboda Safety Association of Kenya (BAK) tawi la Nairobi ilisisitiza kuwa wanachama wake hawatajihusisha na aina yoyote ya vurugu na hawataunga mkono maandamano hayo.

“Kama wanaume na wanawake wanaolifanya jiji la Nairobi kusonga mbele kupitia msongamano, mvua na magumu, tunasema wazi: sisi si sehemu ya uharibifu huo. Sisi si zana za michezo ya kisiasa. Sisi ni hustlers — na tunapanda kwa ajili ya amani, heshima na maisha,” ilisomeka taarifa hiyo.

Chama hicho, ambacho wanachama wake wanaendesha shughuli zao kote jijini, kilieleza hali ngumu ya kiuchumi inayowakabili maelfu ya waendeshaji boda boda wanaotegemea mapato ya kila siku kutimiza mahitaji ya msingi.

Walionya kuwa kufungwa kwa barabara, maduka na makabiliano na polisi kungeweza kuharibu vyanzo vyao vya mapato na kuweka vifaa vyao na usalama wao hatarini.

“Siku moja ya ghasia ni siku moja ya njaa majumbani mwetu. Barabara zikifungwa, hatupati kipato. Maduka yakifungwa, wateja wanapotea. Polisi wakipambana na waandamanaji, ni pikipiki zetu zinazochomwa na watu wetu wanaonaswa katikati ya mapigano,” taarifa hiyo ikaongeza.

Wakati wakikiri kuwa katiba inaruhusu maandamano, chama hicho kilisisitiza kuwa maandamano hayo lazima yawe ya amani na kufanyika kwa mujibu wa sheria.

"Tunaheshimu Katiba. Tunaamini katika Ibara ya 37 — haki ya kukusanyika na kuandamana — lakini tu ikiwa ni kwa amani na bila silaha. Hakuna mawe, hakuna moto, hakuna uporaji. Maana vurugu ikianza, Katiba huondoka. Na sisi pia tunaondoka,” taarifa hiyo ikaeleza.

Waendesha bodaboda hao waliitaka serikali kuwalinda wao pamoja na Wakenya wengine wa kawaida.

“Tunaomba Serikali: ilinde barabara zetu, ilinde pikipiki zetu, ilinde maisha yetu. Hatutaki upendeleo — tunataka haki,” walieleza.

Pia waliwajibu waandalizi wa maandamano hayo moja kwa moja, wakisema kuwa makundi hayo hayaakisi maslahi ya waendeshaji boda boda.

“Kwa wale wanaopanga kuvuruga njia zetu na kuhatarisha usalama wetu: hamtuwakilishi. Hamjali maumivu yetu. Msifiche fujo zenu nyuma ya kofia zetu,” walionya.

“Waendesha bodaboda wamejenga jina nchini. Tunasaidia visa vya dharura, tunategemeza familia, na tunachangia uchumi. Hatutakubali kuwa vibaraka wa vita vya watu wengine. Acha Nairobi isonge. Acha Wakenya wafanye kazi. Hustle iendelee,” taarifa hiyo ikahitimisha.

Taarifa hiyo imetolewa wakati Kenya ikijiandaa kwa wimbi jipya la maandamano yanayoongozwa na kizazi cha Gen Z mwezi huu, ambapo maandamano makubwa yanatarajiwa kufanyika Jumatano, Juni 25.

Tarehe hiyo ya Juni 25 inaadhimisha mwaka mmoja tangu maandamano ya kihistoria yaliyoongozwa na Gen Z dhidi ya Mswada tata wa Fedha wa 2024.

Mwezi Juni 2024, maelfu ya vijana Wakenya walijipanga kupitia kampeni za Occupy Parliament na RejectFinanceBill2024, wakivunja ulinzi, kuingia ndani ya majengo ya Bunge la Kitaifa na kuchoma sehemu za majengo hayo.

Polisi walijibu kwa kutumia mizinga ya maji, gesi ya kutoa machozi, risasi za mpira, na kwa mujibu wa wanaharakati wa haki za binadamu, hata risasi za moto, ambapo zaidi ya watu kumi na wawili walipoteza maisha, wengi walijeruhiwa, na zaidi ya mia moja kukamatwa.