Michael Olise akamilisha uhamisho kujiunga na Bayern baada ya kuzikataa Man Utd na Chelsea

Michael Olise amekamilisha uhamisho wake kutoka Crystal Palace kwenda Bayern Munich.

Timu hiyo ya Bundesliga italipa pauni milioni 50.8 (€60m) ikijumuisha nyongeza ili kumleta mchezaji huyo mwenye umri wa miaka 22 Allianz Arena.

Mfaransa huyo amesaini mkataba wa miaka mitano Bayern.

"Mazungumzo na FC Bayern yalikuwa mazuri sana, na nina furaha kubwa sasa kuchezea klabu kubwa kama hii," alisema Olise.

"Ni changamoto kubwa, na hilo ndilo hasa nililokuwa nikitafuta. Nataka kujidhihirisha katika kiwango hiki na kutekeleza wajibu wangu katika kuhakikisha kwamba tunashinda mataji mengi iwezekanavyo na timu yetu katika miaka ijayo."

Olise alikuwa akilengwa na Chelsea, Man Utd na Newcastle msimu huu wa joto, lakini amechagua kujiunga na kikosi cha Vincent Kompany.

Mkurugenzi wa michezo wa Bayern Max Eberl alisema: "Michael Olise ni mchezaji anayeweza kuleta mabadiliko na kuvutia watu wengi kutokana na aina yake ya uchezaji.

Alijiunga na Palace miaka mitatu iliyopita kwa uhamisho wa £9m kutoka Reading, haraka na kuwa mwanachama muhimu wa timu ya Eagles.

Uchezaji wake ulivutia macho kutoka kwa vilabu kadhaa vya juu vya Premier League, zikiwemo United na Chelsea.

Mchezaji huyo mwenye umri wa miaka 22 alikaribia kujiunga na The Blues msimu uliopita wa joto, lakini badala yake akafunga mkataba mpya wa kusalia Selhurst Park.

Mkataba huo ulikuwa na kifungu kipya cha kutolewa, ambacho Bayern ilianzisha mwezi uliopita.