Olunga awaomba mashabiki kufurika Nyayo kuishangilia Kenya dhidi ya Gabon

Nahodha wa Harambee Stars Michael Olunga ana ujumbe kwa Wakenya kabla ya timu hiyo kurejea katika Uwanja wa Kitaifa wa Nyayo baada ya zaidi ya miaka mitatu ya kuandaa mechi za kimataifa katika mataifa mengine.

Mara ya mwisho Harambee Stars kuandaa mechi ya ushindani nyumbani ilikuwa tarehe 15, Novemba 2021 dhidi ya Rwanda katika mechi ya kufuzu kwa Kombe la Dunia la 2022.

Tangu wakati huo, Kenya imelazimika kuandaa mechi zake za nyumbani kwingineko kutokana na kutopatikana kwa uwanja ulioidhinishwa na CAF nchini humo.

Huku Uwanja wa Nyayo ukipitishwa kuwa sawa na CAF baada ya kukarabatiwa na kuboreshwa,

Stars itakuwa mwenyeji wa mechi yao ya Kufuzu kwa Kombe la Dunia la FIFA la 2026 dhidi ya Gabon Jumapili.

Kabla ya mechi hiyo, Olunga anawataka mashabiki kujitokeza kwa wingi na kuunga mkono azma yao ya kukata tiketi ya kufuzu kwa fainali za Kombe la Dunia za 2026.

"Ninawaomba mashabiki wetu na Wakenya kwa jumla kujitokeza kwa wingi Jumapili na kutupa uungwaji mkono wa mtu wa 12 ambao tunahitaji na tumekuwa tukikosa. Wakenya wanapenda soka na tunatazamia kukutana nao Jumapili," alisema Olunga kwenye mahojiano na FKF Media.

Mfungaji bora wa Ligi ya Japan J1 2020 alionyesha kufurahishwa kwake na kurejea kwa mashindano ya kimataifa ya soka nchini Kenya.

"Tutacheza mechi yetu ya kwanza ya kimataifa ya ushindani nyumbani baada ya miaka minne na hiyo itakuwa nzuri sana," aliongeza.

Zaidi ya hayo, mfungaji bora wa muda wote wa Al-Duhail alisajili shukrani zake kwa serikali kwa kazi iliyohakikisha Nyayo inaafiki viwango vya CAF kwa mara nyingine tena.

"Ninataka kushukuru Serikali ya Kenya kupitia Wizara ya Michezo kwa kuhakikisha kwamba tuna Uwanja wa Nyayo tayari kwa mechi za kimataifa," alisema.

Kando na Nyayo, kazi ya uboreshaji pia inaendelea katika Kituo cha Kimataifa cha Michezo cha Moi, Kasarani ambacho kinakaribia kukamilika na vilevile katika uwanja wa Kipchoge Keino mjini Eldoret.

Vituo vingine pia vinavyofanyiwa ukarabati ni Uwanja wa Police Sacco, Kirigiti Stadium na Kasarani Annex huku uwanja mpya kabisa, Talanta Sports City ukiendelea kujengwa na kukamilika asilimia  kwa 40 kulingana na sasisho la hivi punde.