Mkufunzi mkuu wa Gor Mahia, Zedekiah "Zico" Otieno, alilazimika kukimbia kuokoa maisha yake baada ya klabu hiyo kucharazwa 2-1 na Nairobi United katika mechi ya fainali ya Kombe la Shirikisho la Soka Kenya mnamo Jumapili.
Kipigo hicho, ambacho kilikamilisha msimu wa Gor Mahia bila taji lolote wala nafasi ya kushiriki soka ya kimataifa, kilichochea hasira mpya miongoni mwa mashabiki, huku Zico akiwa kitovu cha lawama hizo.
Baadhi ya mashabiki wa Gor Mahia walivunja vizuizi, wakaingia uwanjani moja kwa moja kuelekea eneo la benchi la ufundi, wakimlenga Zico.
Kocha huyo alilazimika kukimbia nje ya uwanja na kujificha katika chumba salama ndani ya uwanja huo.
Video inayosambaa mtandaoni inaonyesha mchezaji huyo wa zamani wa kimataifa wa Kenya akiwa ameketi nyuma ya kochi, akiwa amezungukwa na maafisa wa usalama, akiwa amepigwa na butwaa na akishika kichwa chake — taswira inayodhihirisha mshangao na huenda majuto makubwa.
Hii si mara ya kwanza kwa Zico kuwa kwenye shinikizo kutoka kwa mashabiki wa Gor Mahia.
Mwaka 2011, katika kipindi chake cha awali akiwa kocha wa Gor Mahia sambamba na kufundisha Harambee Stars, mashabiki walimgeukia kufuatia msururu wa matokeo duni.
Kipigo cha 2-1 dhidi ya Congo United waliokuwa mkiani kwenye Uwanja wa City kilikuwa kilele cha hasira hizo, kikimaliza matumaini ya Gor Mahia kutwaa ubingwa.
Mashabiki wenye hasira walirusha mawe na vitu vingine, na kuwalazimu wachezaji na benchi la ufundi kutawanyika.
Zico alihitaji kusindikizwa kwa ulinzi mkali wa polisi huku hali ya taharuki ikitanda. Historia inaonekana kujirudia.
Haijabainika iwapo mkufunzi huyo mwenye uzoefu ameripoti tukio hilo kwa polisi.
Pia haijajulikana ni hatua gani uongozi wa klabu hiyo, FKF na wadau wengine watachukua kuhusu suala hilo, kwa lengo la kuhakikisha usalama wa kocha huyo na kuziba mianya ya matukio kama hayo siku zijazo.
Gor Mahia wanatarajiwa kufanya mabadiliko makubwa katika siku chache zijazo, kuanzia na benchi la ufundi.
Zico, pamoja na baadhi ya wanachama wa benchi la ufundi, wanatarajiwa kuondoka, huku klabu hiyo ikiripotiwa kuwa katika mazungumzo ya kumleta kocha wa kigeni kuiongoza upya timu hiyo.
Klabu pia itawekeza katika kikosi cha wachezaji, ambapo zaidi ya wachezaji kumi waliopo kwa sasa wanatarajiwa kuondoka ili kutoa nafasi kwa wachezaji wapya.
© Radio Jambo 2024. All rights reserved