Arteta Aahidi Kuongoza Arsenal Kutwaa Taji la EPL Msimu Huu

London, Uingereza, Julai 22, 2025 — Kocha mkuu wa Arsenal, Mikel Arteta, ameweka wazi dhamira yake ya kuliongoza tena klabu hiyo kwenye kilele cha soka kwa kutwaa ubingwa wa Ligi Kuu ya Uingereza (EPL) msimu huu wa 2025/26.

Akizungumza na wanahabari jijini London, Arteta alisema kuwa timu yake imejifunza kutokana na makosa ya misimu iliyopita na sasa iko tayari kuchukua hatua ya mwisho.

“Ndio, naamini tunaweza kushinda ligi msimu huu,” alisema Arteta. “Tumefanya kazi kubwa nyuma ya pazia. Tumeongeza ubora, tumejipanga kisaikolojia, na kikosi kina njaa ya ushindi.”

Usajili Mpya Waimarisha Kikosi

Arsenal wamesajili nyota kadhaa waliothibitisha ubora wao barani Ulaya. Kepa Arrizabalaga, Martin Zubimendi, Christian Norgaard na Noni Madueke tayari wamejiunga na kikosi.

Aidha, klabu hiyo bado inaendelea na mazungumzo ya kuwasajili Cristhian Mosquera kutoka Valencia na Viktor Gyokeres wa Sporting CP.

Arsenal Yakamilisha Makubaliano ya Kumsajili Viktor Gyokeres kutoka Sporting

“Tunahitaji kuwa na kikosi kipana chenye ushindani mkubwa. Lengo ni kushindana kwenye mashindano yote – ligi, FA Cup, Carabao Cup na Ligi ya Mabingwa,” alisema kocha huyo.

Kukomesha Tatizo la Majeruhi

Arteta alikiri kuwa msimu uliopita walikumbwa na changamoto ya majeruhi, hali iliyowazuia kutimiza malengo yao.

Alisema sasa wana mpango wa kuhakikisha wana kikosi chenye uwezo wa kushindana bila kutegemea wachezaji wachache.

“Msimu uliopita mara nyingi tulilazimika kuchagua kikosi kwa kuzingatia nani anaweza kucheza dakika 90. Sasa tunataka kuwa na wachezaji 20 wa kiwango cha juu,” alifafanua.

Chipukizi Kupewa Nafasi

Katika maandalizi ya msimu huu, Arteta amejumuisha wachezaji wanane kutoka akademi ya klabu, akiwemo Max Dowman mwenye umri wa miaka 15.

Kocha huyo anaamini kizazi kipya kina uwezo wa kujifunza haraka na kuingia kikosini mapema.

“Tunataka kukuza vipaji vya ndani. Vijana wa sasa wanaelewa mchezo kwa haraka. Tutawalea kwa utaratibu na kuwaandaa kwa hatua kubwa,” alisema.

Lengo: Kuvunja Ukame wa Miaka 21

Kwa mara ya mwisho Arsenal walitwaa taji la EPL mwaka 2004 chini ya Arsène Wenger. Arteta anaamini sasa ni wakati wa kuandika historia mpya.

“Tumejifunza. Tumejipanga. Tuna kila sababu ya kuamini kwamba msimu huu ni wetu,” alihitimisha kwa kujiamini.