NOW ON AIR

Rais Ruto Aahidi Milioni Moja kwa Kila Mchezaji Kufikia Jumatatu

Kwa mara ya kwanza katika historia ya mashindano ya CHAN, wachezaji wa Harambee Stars watapata zawadi ya fedha taslimu kutoka kwa serikali.

na Tony Mballa

Michezo03 August 2025 - 21:25

Muhtasari

Rais Ruto ameahidi kutoa zawadi ya shilingi milioni moja kwa kila mchezaji wa Harambee Stars baada ya ushindi wao wa bao moja kwa sifuri dhidi ya Kongo katika mashindano ya CHAN 2024.
Kiongozi huyo wa taifa asema serikali itaendelea kusaidia wachezaji kwa zawadi kila hatua wanayopiga, huku akisisitiza kuwa taifa linawategemea.

NAIROBI, KENYA, Agosti 4, 2025 – Nairobi, Kenya Rais wa Jamhuri ya Kenya, Dkt. William Ruto, ameahidi kuwakabidhi wachezaji wote wa Harambee Stars shilingi milioni moja kila mmoja kufikia asubuhi ya Jumatatu, kama tuzo ya ushindi wao wa bao moja kwa sifuri dhidi ya Jamhuri ya Kidemokrasia ya Kongo katika mchuano wa kwanza wa Kundi A wa mashindano ya CHAN uliofanyika katika Uwanja wa Kimataifa wa Moi, Kasarani.

Rais aliahidi zawadi zaidi endapo timu itaendelea kung’ara katika mashindano ya Afrika kwa Wachezaji wa Ndani (CHAN) mwaka 2024

Rais alifanya ziara ya kushtukiza kwenye vyumba vya kubadilishia nguo na kutangaza zawadi hiyo nono huku akimpongeza Austin Odhiambo kwa bao la kipekee lililowapa Kenya ushindi.

**Rais Ruto awapongeza wachezaji wa Harambee Stars kufuatia ushindi wao dhidi ya Kongo katika uga wa Kasarani kwenye mtanange wa CHAN**

Ziara ya Kushtukiza Yaleta Furaha Kubwa

Baada ya kipenga cha mwisho, Rais alijitokeza ghafla kwenye vyumba vya wachezaji na kutangaza tuzo hiyo kwa furaha kuu, akimwagiza Rais wa Shirikisho la Soka nchini, Hussein Mohammed, kufika Ikulu kuchukua fedha hizo kwa niaba ya timu.

“Na si sasa kila mtu ako na milioni moja,” Ruto aliwaambia wachezaji waliokuwa wamejawa na furaha. “Kesho asubuhi, Hussein, pitia pale Ikulu uchukue haki ya hawa vijana.”

Ahadi Zaidi kutoka kwa Kiongozi wa Taifa

Rais Ruto alikumbusha kuwa serikali yake imetenga shilingi milioni mia sita kwa ajili ya ukuzaji wa mchezo wa soka nchini. Kati ya ahadi alizozitoa awali kwa Harambee Stars katika mashindano haya ni:Shilingi milioni moja kwa kila ushindi

Shilingi laki tano kwa kila sare.
Shilingi milioni sitini endapo watafuzu hatua ya robo fainali.
Shilingi milioni sabini iwapo watafikia hatua ya nusu fainali.

**Rais Ruto ajumuika na wachezaji baada ya mechi yao ya CHAN ugani Kasarani**

Hamasa Yazidi Kutikisa Stars

Rais wa Shirikisho la Soka, Hussein Mohammed, aliyekuwa ameandamana na Rais, alionekana kutikisa kichwa kwa ridhaa na shukrani kwa uungwaji mkono wa serikali.

Mechi ijayo ya Harambee Stars inatarajiwa kuibua hisia zaidi, si tu kwa heshima ya kitaifa bali pia kwa zawadi nono zilizoahidiwa na serikali.

Wakati wachezaji walipoendelea kusherehekea, nyimbo za ushindi na shangwe zilijaa kwenye korido za uwanja – sauti za uzalendo na matumaini mapya kwa soka la Kenya.

Kenya Yachukua Uongozi wa Kundi A

Baada ya ushindi huo wa kuvutia, Kenya sasa inaongoza Kundi A na itamenyana na Angola katika mchuano wao ujao. Wachezaji watafanya mazoezi mepesi ya kurejesha nguvu kabla ya kuanza tena mazoezi kamili siku ya Jumanne.