Polisi wakabiliana na vijana huku ghasia zikishuhudiwa Kisumu

Ghasia zilizuka katika eneo la Kondele mjini Kisumu baada ya Mwenyekiti wa IEBC Wafula Chebukati kumtangaza William Ruto kuwa Rais Mteule Jumatatu Agosti 15, 2022.

Machafuko ya ghafla yalizuka mwendo wa saa kumi na mbili unusu jioni baada ya kutangazwa kwa matokeo ya urais.

Wakazi hao walikabiliana na polisi katika mapigano ya paka na panya.

Jumatatu kuanzia saa tisa alasiri, dalili za vurumai zilitanda katika mzunguko wa Kondele.

Maafisa wa polisi wa kupambana na ghasia walilazimika kupiga vitoa machozi, na kuwalazimu vijana waliokuwa wamejazana eneo hilo kukimbilia usalama wao.