Patanisho: Jamaa aachwa baada ya msichana mwingine kushika simu yake alipopigiwa na mpenziwe, adai simu ilikuwa inacharge

Jamaa aliyejitambulisha kama Kelvin Chege Wanjiku ,24, kutoka Murang'a alituma ujumbe akiomba kupatanishwa na mchumba wake Mercy Cheruiyot ambaye alikosana naye hivi majuzi.

Chege alisema mahusiano yake ya mwaka mmoja yalisambaratika wiki jana baada ya mchumba wake kumpigia simu ikachukuliwa na mwanadada mwingine.

"Nilikuwa kwenye mahusiano na Mercy, tulikuwa tumepanga kuoana. Alianza kupiga piga simu nakosa kuchukua, akaanza kusema sitaki mambo yake niko na mpango wa kando. Sikuwa na mpango wa kando, ni zile tu shughuli shughuli za kazi," Chege alisimulia.

Aliongeza, "Wiki jana alipiga simu alafu ikashikwa na msichana ambaye tunafanya kazi na yeye. Simu ilikuwa kwa charge, huyo msichana akashika akamwambia siko karibu. Mimi sikuwa na mipango wa kando. Kuna siku alipiga jioni nikakosa kushika akasema niko na mtu. Nilikuwa nimechoka sasa nilikuwa nimelala tu."

Chege alisisitiza kwamba angependa kumuomba msamaha Bi Mercy na kumhakikishia kwamba hana mahusiano yoyote ya kando.

Juhudi za kumpatanisha Chege na mpenziwe hata hivyo hazikufua dafu kwani Mercy hakushika simu wakati alipopigiwa.

"Nilikuwa nimeongea na kakake akaniambia yuko huko. Alisema kwanza atulie sijui mpaka lini," Chege alisema.

Chege alimuoamba mpenziwe msamaha hewani na kumhakikishia kwamba hana mwingine.

"Mimi sina mahusiano na mwanamke mwingine. Nilikuwa nampenda sina mwingine. Anisamehe tu arudi tuanze boma," alisema.

Je, una maoni gani kuhusu Patanisho ya leo?