Gidi Gidi Maji Maji wazungumza baada ya 'kusalimiwa' kwa kutumbuiza katika hafla ya Jamhuri Day

Wasanii wazoefu GidiGidi na MajiMaji wa kundi la zamani la GidiGidi MajiMaji wamejibu baada ya baadhi ya wanamtandao wa Kenya kuwakosoa kwa kutumbuiza kwenye sherehe za 61 za Jamhuri Day kwenye bustani ya Uhuru Gardens, jijini Nairobi.

Marapa hao wawili waliogeuka kuwa watangazaji wa redio walikuwa miongoni mwa kundi la wasanii wazoefu wa Kenya waliotumbuiza kwenye sherehe hizo zilizofanyika Alhamisi, Desemba 12.

Baadhi ya wanamtandao walionyesha kusikitishwa kwao na wasanii waliotumbuiza kwenye hafla hiyo, huku mshawishi maarufu wa mitandao ya kijamii Francis Gaitho hata akifichua nambari zao za simu kwa wafuasi wake ili wawape ‘salamu'.

Akiongea kupitia akaunti yake ya Facebook, Gidi Gidi alithibitisha kuwa baadhi ya watumiaji wa mtandao walimfikia baada ya nambari yake kufichuliwa.

"Can't a young Luo make money any moree.. Wueh, nimepokea salamu leo," Gidi alisema.

"Francis Gaitho amewapa watu wa jumuiya ya mtandaoni nambari yangu, anaweza kuwashauri kuzungumza katika lugha zetu za taifa Kiingereza au Kiswahili ili tushirikiane. Chukieni mchezo, si mchezaji,” alisema katika taarifa nyingine.

Mtangazaji huyo wa Radio Jambo alimkashifu mshauri huyo wa mitandao ya kijamii ambaye alifichua nambari yake akiashiria kwamba hakuwahi kujitokeza wakati wa harakati muhimu.

"Yaani makosa yangu ni kuperform tu kwenye hafla ya kitaifa?"Gidi alisema.

Aliendelea kufichua baadhi ya jumbe alizotumiwa na jinsi alivyowajibu wanamtandao.

"Wakati ujao unapompigia kura kiongozi na anakukatisha tamaa, tafadhali, mchukie peke yake usinishirikishe," alisema.

Kwa upande wake, Majimaji pia ilimkosoa mshawishi huyo kwenye mitandao ya kijamii ambaye alivujisha nambari yake akisema kwamba angetumia nguvu na muda wake kwa sababu nzuri.

"Niaje kaka @FGaitho237 acha kutumia vijana kama silaha kwa nguvu zako na ndoto zako mvua. Huko karibu kuleta mabadiliko Kenya au Kiambu. Huelewi uanaharakati, siasa au Kenya ina/inayopitia. We ambia wakenya kitu rahisi!” Majimaji aalisema.

Alimshinikiza mshawishi huyo wa mitandao ya kijamii kuwahimiza Wakenya kujiandikisha kuwa wapiga kura na kudai haki itendeke kwa Wakenya waliofariki na kupoteza mali kutokana na dhuluma.