Mchungaji azua utata kwa kuwashikilia waumini mateka ili kuchanga Sh 5.2 milioni

Mhubiri na mwimbaji mashuhuri wa nyimbo za injili wa Marekani, Marvin Sapp, anakabiliwa na ukosoaji mkali baada ya video kuonyesha akiwataka wasaidizi wa kanisa kufunga milango wakati waumini wakitoa sadaka, hatua inayotafsiriwa na wengi kama kuwashikilia mateka ili kufanikisha mchango wa dola 40,000 (takriban KSh 5,200,000).

Tukio hilo limeripotiwa kufanyika Julai mwaka jana katika kongamano la 109 la Pentecostal Assemblies of the World Convention huko Baltimore, Maryland.

Katika video hiyo, Sapp anasikika akisema kwa msisitizo: "Kuna waumini 1,000 hapa... Nimesema fungeni milango. Wasaidizi, fungeni milango. Tutatoka pamoja."

Kisha aliwahimiza waumini waliokuwepo na wengine waliokuwa wakitazama mtandaoni kutoa dola 20 kila mmoja ili kufanikisha lengo la dola 40,000.

Tukio hili limezua mjadala mkali mitandaoni, ambapo wakosoaji wanamtuhumu Sapp kwa kutumia mbinu za kulazimisha kuchangisha fedha.

Mmoja wa watumiaji wa mtandao wa X aliandika: "Marvin Sapp anawaibia waumini wake kwa dola 40,000—na anatumia jina la Mungu kufanya hivyo."

Katika kujibu ukosoaji huo, Sapp alitoa taarifa kupitia Facebook akisema kwamba agizo lake la kufunga milango lililenga kuhakikisha usalama na kuzuia usumbufu wakati wa utoaji wa sadaka.

Mchungaji huyo alieleza kuwa lengo lake lilikuwa ni kuunda mazingira salama na yenye heshima kwa wale waliokuwa wakitoa na wale waliokuwa wakishughulikia fedha hizo.

 "Baadhi ya watu wameelewa vibaya tukio hili na kudhani nilikuwa nawalazimisha watu watoe pesa. Hilo halikuwa lengo langu hata kidogo," aliandika.

Hata hivyo, maelezo yake hayajawazuia wakosoaji kuhoji mbinu za viongozi wa kidini katika kuchangisha fedha.

Baadhi wanahoji kuwa vitendo vya aina hii vinaweza kudhoofisha imani ya waumini na kuzua maswali kuhusu matumizi ya fedha za sadaka.

Kwa upande mwingine, wafuasi wa Sapp wamemtetea wakisema kuwa kanisa linahitaji rasilimali ili kuendesha shughuli zake, na kutoa sadaka ni sehemu ya imani na ibada.

Licha ya maelezo yake, mjadala kuhusu uwajibikaji wa viongozi wa kidini katika masuala ya fedha unaendelea kupamba moto, huku wengi wakitaka uwazi zaidi katika usimamizi wa michango ya waumini.