Gachagua kwa Ruto: Siogopi kukamatwa

Aliyekuwa Naibu Rais Rigathi Gachagua ameapa kuendelea kufichua kile alichokitaja kuwa ‘mikataba chafu’ serikalini bila kutishwa na yeyote.

Huku akiwakashifu wanaotaka akamatwe kwa madai ya kukiuka Sheria ya Usiri, Gachagua alisema aliapa kufanya jambo sahihi na kutii sheria.

Akizungumzia sera ya kigeni ya Kenya, Gachagua alisema makubaliano ya sasa ya kidiplomasia na Sudan yanaendeshwa na maslahi ya kibiashara.

"Niliona mtu akijaribu kunipa mhadhara kwamba nisizungumze kuhusu hilo kwa sababu niliapa kwa baadhi ya katiba...katiba ambayo mimi na Muturi (aliyekuwa Waziri Mkuu wa Utumishi wa Umma) tuliapa ni kufanya jambo sahihi na kushika sheria," alisema.

Gachagua aliyasema hayo wakati wa ibada ya ukumbusho wa aliyekuwa Rais Mwai Kibaki katika kaunti ya Nyeri.

Aliyekuwa mbunge mteule Wilson Sossion na mbunge wa Homa Bay Town Peter Kaluma ni miongoni mwa waliotaka Gachagua akamatwe na kufunguliwa mashtaka.

Sossion alimshutumu DP huyo wa zamani kwa kufichua mambo ambayo aliapa kutunza siri akiwa serikalini. "Kuvunja kiapo cha usiri ni uhaini.

Jambo lolote linalojadiliwa na Rais lazima lisambazwe hadharani, haswa katika mahojiano ya runinga.

Sielewi ni kwa nini DCI haijamkamata Gachagua bado," Sossion alisema. Kaluma alitaja matamshi ya Gachagua kuwa ya kizembe na hatari kwa nchi.

Alisema Gachagua anaweza kusema lolote kuhusu Rais Ruto, lakini hawezi kushambulia mamlaka, sifa ya kimataifa na uthabiti wa jamhuri ya Kenya jinsi ambavyo amekuwa akifanya.

"Wananchi wote ni sawa mbele ya sheria. Gachagua hayuko juu ya sheria. Mkamate na kumfungulia mashtaka Gachagua kwa makosa yanayohusiana na kuhujumu jamhuri."

Katika mahojiano ya hivi majuzi kwenye runinga, Gachagua alimshutumu Rais Ruto kwa kutumia wadhifa wa urais kuendeleza maslahi yake ya kibinafsi ya kibiashara na kifedha.

Ruto alisema Gachagua alimkashifu na kuomba apewe Sh10 bilioni kwa kumuunga mkono 2022