Sakaja: Sikutuma Majambazi Kuwashambulia Waandamanaji Nairobi

Sakaja alitaja madai hayo kuwa “ya kupotosha na yasiyo na msingi.”

Kupitia taarifa kali, Gavana Sakaja alijitenga na kile alichokitaja kama “kampeni chafu” inayolenga kuharibu sifa yake.

“Katika siku chache zilizopita, kumekuwepo na madai ya uongo dhidi yangu. Nataka kusema wazi kuwa katika maisha yangu yote ya kisiasa, sijawahi kutumia vurugu kupata mamlaka. Rekodi yangu inajieleza, na kauli mbiu yangu imekuwa na itaendelea kuwa Siasa Safi,” alisema.

Sakaja aliwatuhumu watu wanaojulikana kwa kupanga ghasia na kisha kujaribu kumtupia lawama.

“Madai haya si ya kweli tu, bali ni juhudi za kukata tamaa za wanasiasa ambao taaluma zao zimejengwa juu ya vurugu na vitisho. Wamefikia hatua ya kuajiri wahuni na hata kuwavalisha vifaa vinavyohusiana na Kaunti kama saa ya ‘Dishi na County’ ili ionekane kama wanafanya kazi nasi,” alisisitiza.

“Hii ni sawa na mbinu za zamani ambapo wafuasi wa chama fulani walivalishwa mavazi ya chama pinzani na kuachiliwa kwa wananchi,” alisema Sakaja.

Gavana huyo alifichua kuwa amezungumza na uongozi wa polisi kuhakikisha kuwa maandamano ya amani yanawezeshwa na kwamba wananchi wote wanalindwa.

“Tuheshimu sheria. Vurugu, ghasia na uharibifu si ishara za demokrasia. Tutalilinda jiji letu kwa mujibu wa sheria.”

Sakaja alihitimisha kwa kuwataka wakaazi wa Nairobi kuwa waangalifu na wasidanganywe na “wanasiasa waasi wenye ajenda binafsi.”

“Ofisi yangu itaendelea kuwa wazi, ya uwazi na kujitolea kuwatumikia. Msidanganywe na mbinu zile zile za zamani; ghasia zilizoandaliwa hazina nafasi katika Nairobi tunayoijenga.”

Gavana huyo alidai kuwa mbinu zinazotumiwa zinanuia kumchafulia jina na kupotosha mtazamo wa umma kwa manufaa ya kisiasa, akisema kuwa zinadunisha kilio halisi cha vijana na kudharau mateso ya walioathirika.

Akirejelea matukio ya kusikitisha ya hivi karibuni—ikiwemo uporaji, majeraha na ripoti za kupigwa risasi kwa mwandamanaji Boniface Kariuki—Sakaja alitoa wito wa kupatikana kwa haki badala ya kupotoshwa na madai yasiyothibitishwa.

“Kupeleka mjadala kwenye madai yasiyothibitishwa dhidi yangu si tu ni uongo, bali ni ukosefu wa haki kwa wahanga na kwa wafanyabiashara wanaohesabu hasara ya mamilioni,” alisema.

Gavana huyo aliitaka idara za uchunguzi kuchukua hatua za haraka kuhakikisha wote waliohusika na vurugu na ghasia wanakabiliwa na mkono wa sheria.

Sakaja alisisitiza kujitolea kwa utawala wake katika kuheshimu uhuru wa kikatiba.

Alieleza kuwa Serikali ya Kaunti ya Nairobi imekuwa ikitoa huduma kama ambulansi, maeneo ya mikusanyiko na huduma za afya ya umma ili kuwezesha maandamano ya amani na matukio ya vijana.

Wakati kulipokuwa na sintofahamu kuhusu kifo cha Albert Ojwang, Sakaja aliruhusu kutolewa kwa video ya CCTV katika Hospitali ya Mbagathi ambayo ilisaidia katika uchunguzi, sambamba na msaada alioutoa kwa familia ya marehemu.

“Tunaamini katika haki ya kuandamana, lakini tunapaswa kulaani na kufichua wanaopora haki hizi kwa maslahi binafsi au ya kisiasa,” alisema.

Taarifa ya Gavana Sakaja inatolewa baada ya maandamano ya vijana ya hivi karibuni ambapo wahuni walitawala baadhi ya maeneo ya jiji na kuvuruga waandamanaji wa amani waliokuwa wakidai haki kwa mwanablogu Albert Ojwang’, aliyefariki akiwa mikononi mwa polisi.