Baraza la Maaskofu wa Kanisa Katoliki Nchini Kenya (KCCB) limetoa taarifa kali dhidi ya serikali ya Rais William Ruto, likiituhumu kwa kuendeleza mauaji ya kiholela, kukandamiza wapinzani, na kutumia vibaya rasilimali za umma huku likipuuza mateso ya Wakenya wa kawaida.
Katika taarifa ya pamoja iliyotolewa Jumanne, maaskofu wa majimbo yote 30 ya Kanisa Katoliki kote nchini walieleza hofu yao kuhusu kile walichokitaja kama kuporomoka kwa haki, uwajibikaji na utu chini ya utawala wa sasa.
“Wale walio na jukumu la kudumisha sheria na utulivu wanapogeuka kuwa chanzo cha hofu na ukosefu wa haki, hiyo ni ishara ya mgogoro wa kimaadili katika taifa,” walionya maaskofu.
Walielezea kuwepo kwa mtindo wa watu kutoweka kwa njia ya kutatanisha, mauaji ya kiholela, na vitisho vya nguvu kutoka kwa maafisa wa usalama.
Wakirejelea vifo vya hivi majuzi, vikiwemo vya akina baba John Maim na Allois Bett, mwanaharakati Albert Ojwang, na kuuawa kwa kupigwa risasi hadharani kwa mchuuzi Boniface Kariuki jijini Nairobi, maaskofu walitaka uchunguzi kamili na hatua za kisheria zichukuliwe dhidi ya wahusika.
“Maisha ya kila Mkenya ni ya thamani. Hatupaswi kupuuza kifo chochote na kusema ‘twende mbele tu’. Kenya inastahili kuwa bora zaidi,” walisema maaskofu.
Walikosoa vikali hatua ya serikali kukandamiza maandamano ya vijana, hasa yaliyoongozwa na kizazi cha Gen Z mwaka jana, waliokuwa wakipinga ushuru wa juu na ukosefu wa fursa.
Badala ya kusikiliza kilio chao, maaskofu walisema, vyombo vya dola vilijibu kwa ukatili, utekaji na mauaji.
“Vijana wetu si maadui wa taifa,” walisema maaskofu. “Ni raia wenye hoja halali ambao wanastahili kusikilizwa na kuungwa mkono—si kutishwa, kunyamazishwa au kuuawa.”
Maaskofu pia walilaani upendeleo wa kisiasa katika usambazaji wa fedha za maendeleo, wakituhumu viongozi wa serikali kwa kuendeleza ubaguzi na kugawa zawadi za kisiasa ilhali mahitaji ya msingi kama elimu, afya na uwezeshaji wa vijana hayaangaliwi.
“Rasilimali za umma zinatumika kwa matangazo ya kisiasa badala ya maendeleo ya taifa,” walisema. “Hili linadumaza rushwa na kuongeza pengo la ukosefu wa usawa. Uongozi unapaswa kuwatumikia wote, si maslahi ya vyama.”
Wakati huohuo, maaskofu walilalamikia kile walichokiita utekelezaji wa sheria kwa upendeleo, wakisema kuwa watu wenye ushawishi wanaonekana kuwa juu ya sheria huku masikini na wale wanaopaza sauti wakikabiliwa na adhabu ya haraka.
“Hali hii inadhoofisha taasisi zetu na kuchochea chuki. Sheria haipaswi kutumiwa kama silaha,” walisema.
Sasa Kanisa limeitaka serikali kufanya uchunguzi huru kuhusu ukiukaji wa haki za binadamu, kulinda uhuru wa kiraia, kuhakikisha usawa mbele ya sheria, kusitisha utawala wa hofu, na kuanzisha mazungumzo ya kweli ya kitaifa yanayojumuisha vijana, viongozi wa dini, na mashirika ya kiraia.
“Serikali lazima iachane na kupuuza vifo vya Wakenya. Uongozi wa kweli unasikiliza, unaponesha na kurejesha matumaini,” walisema maaskofu.
Vilevile waliwahimiza Wakenya kudumisha tumaini, na kuwaambia vijana: “Sauti yenu ni muhimu. Kaeni na amani, msemi ukweli, na msikate tamaa.”
© Radio Jambo 2024. All rights reserved