Murkomen Aonya Waandamanaji Wasitumiye Vibaya Uhuru Wao

Waziri wa Usalama wa Ndani, Kipchumba Murkomen, ametoa tahadhari dhidi ya vitisho vilivyotolewa mtandaoni na baadhi ya watu kuhusu kuvamia Ikulu ya Nairobi wakati wa maandamano yaliyopangwa na Gen Z kufanyika Juni 25, 2025.

Akizungumza katika Ikulu ya Nairobi Jumanne, Juni 24, 2025, Murkomen alisema kuwa ni Kenya pekee ambako mtu anaweza kuandika hadharani kuhusu nia ya kuvamia Ikulu au Bunge na akaachiwa huru bila kuchukuliwa hatua yoyote.

“Ni Kenya pekee ambapo mtu anaandika kwenye mitandao ya kijamii kuwa watavamia Ikulu, mahakama au Bunge. Na hata wakifikishwa mahakamani, wanaachiwa na kuambiwa warudi nyumbani bure bila hatua yoyote kuchukuliwa dhidi yao,” alisema wakati wa kifungua kinywa na mabingwa wa Ligi Kuu ya FKF kilichofanyika Ikulu, Juni 24, 2025.

Murkomen alisema kwamba katika mataifa mengine kama Uingereza na Marekani, vitisho kama hivyo havikubaliki.

“Katika Uingereza, kwa mfano, kama mtu atatweet au kuandika kwenye mitandao ya kijamii kuwa atatembelea Buckingham Palace au Bunge, hakuna mtu atasubiri aende mtaani, atachukuliwa moja kwa moja kutoka nyumbani kwake na kufunguliwa mashtaka. Iwapo raia wa Marekani ataandika kuwa anavamia White House, Secret Service watatumwa moja kwa moja nyumbani kwake,” aliongeza.

Vile vile, Murkomen aliwataka polisi kuwa wakali na wasio na huruma wanapokabiliana na wahuni watakaohusika kwenye maandamano hayo yaliyopangwa.

Kwa mujibu wa Murkomen, serikali haitakubali kukaa kimya na kutazama waandamanaji wenye silaha wakileta fujo katika jiji kuu la Nairobi.

“Tumepokea taarifa kutoka kwa baadhi ya wanasiasa ambao miezi michache iliyopita walikuwa wakitetea sheria na utulivu, walikuwa wakipinga vurugu, lakini sasa wanapanga kununua mapanga na marungu, wakijaribu kuyasambaza kwa vijana ili walete fujo mjini. Na wanataka tuketi tu na kukunja mikono tukisema hilo ni Kifungu cha 137 cha Katiba,” alisema.

“Polisi wa taifa lazima wawe wakali wanapokabiliana na wahalifu kama hao kwa sababu tunataka nchi hii iwe ya sheria na utulivu, si ya vurugu, ili kila mmoja aweze kufanikiwa,” aliongeza.

Viongozi wa upinzani pamoja na vikundi vya vijana wameapa kurejea mitaani kwa heshima ya waliouawa katika maandamano ya 2024.

Wakati upinzani umetangaza siku hiyo kuwa likizo ya ishara, serikali imeendelea kunyamaza.