Mwanablogu, Ndiangui Kinyagia, ametoweka katika hali isiyoeleweka, hali ambayo imesababisha Chama cha Wanasheria wa Kenya (LSK) kuwasilisha kesi mahakamani kikitaka polisi wawajibike kuhusu kutoweka kwake.
Wakili Wahome Thuku katika chapisho la Jumanne alisema kuwa kwa mujibu wa familia, Kinyagia, mwenye umri wa miaka 31, alionekana mara ya mwisho asubuhi ya Jumamosi, Juni 21, kabla ya simu yake kukatika.
Tangu wakati huo, simu yake haijapokelewa na hakuna yeyote kutoka kwa familia wala marafiki anayejua aliko.
Familia iliripoti kutoweka kwake katika Kituo cha Polisi cha Kinoo mnamo Jumatatu asubuhi na walipatiwa nambari ya kumbukumbu ya tukio (OB).
Hata hivyo, maafisa katika kituo hicho walidai kutokuwa na taarifa zozote kuhusu tukio hilo, wakisema kuwa hakuna ripoti iliyotolewa na Idara ya Upelelezi wa Jinai (DCI), ambayo maafisa wake wanadaiwa kufanya msako nyumbani kwa Kinyagia.
Familia inadai kuwa maafisa wa DCI walivunja mlango wa nyumba ya Kinyagia iliyoko Kinoo, Nairobi, Jumapili, baada ya mvutano wa muda mrefu na mlinzi wa jengo hilo.
Inaripotiwa kuwa maafisa hao walifika nyumbani hapo saa nane mchana kwa kutumia magari takriban kumi na wakakaa katika uwanja wa jengo hilo kwa karibu saa tisa.
Baada ya mazungumzo ya muda mrefu na mlinzi, walivunja mlango na kuingia ndani saa tatu usiku.
Majirani walioshuhudia msako huo walisema kuwa maafisa hao walichukua vitu kadhaa vya binafsi vikiwemo kompyuta mpakato mbili, simu mbili, pasipoti ya zamani na mpya, pamoja na kadi ya homa ya manjano (yellow fever card).
Baada ya msako huo, waliorodhesha mali waliyochukua mbele ya mlinzi na kufunga nyumba hiyo kwa kutumia kufuli lao wenyewe.
Wakati wa tukio hilo, Kinyagia ambaye ni mtaalamu wa teknolojia ya habari (IT), hakuwepo nyumbani. Maafisa hao hawakuonyesha hati yoyote ya mahakama inayowaruhusu kuingia kwa nguvu kwenye nyumba hiyo.
Mama yake alisema kuwa alizungumza naye kwa mara ya mwisho Jumamosi asubuhi, kisha simu yake ikawa kimya. Tangu wakati huo, hakuna mawasiliano yaliyofanyika, na juhudi za familia na marafiki kumtafuta hazijazaa matunda.
“Baadaye niliandamana na familia hadi katika ofisi za LSK ambako tulifanya mkutano na rais wa LSK Faith Odhiambo na maafisa wengine, na tukakubaliana kuwa chama kitaenda mahakamani kuingilia kati zaidi,” alisema Thuku ambaye alihudhuria mkutano huo.
Chama cha Wanasheria wa Kenya kwa sasa kinajiandaa kuwasilisha ombi la dharura katika Mahakama Kuu, likiitaka mahakama kuamuru polisi wamlete Kinyagia na kueleza mazingira ya kutoweka kwake pamoja na uvamizi uliofanywa nyumbani kwake.
Tukio hili linaongeza wasiwasi unaozidi kuongezeka kuhusu usalama wa wanablogu na wanaharakati wenye sauti nchini Kenya, huku miezi ya hivi karibuni ikishuhudia ongezeko la visa vya kutoweka na kutiwa mbaroni kwa njia zisizoeleweka.
© Radio Jambo 2024. All rights reserved