NAIROBI, KENYA, Agosti 12, 2025 — Mwanaharakati na mwandishi mashuhuri Hanifa Aden ametoa wito wa dharura kwa Wakenya na wahisani kumsaidia kupata upasuaji wa masikio baada ya kusumbuliwa na ugonjwa mkali unaosababisha kupoteza uwezo wa kusikia hatua kwa hatua na kutoa usaha.
Amesema hali yake inazidi kuwa mbaya kila siku, huku akitafuta hospitali ya masikio, pua na koo yenye uwezo wa kufanya upasuaji unaohitajika ili kuokoa masikio yake.
Amesema hospitali zote alizotembelea zimekuwa zikimpa suluhisho la muda mfupi, badala ya upasuaji wa kudumu unaoweza kurekebisha vidonda vilivyo ndani ya masikio yake.
Hii ni mara ya kwanza kwa Hanifa kuzungumzia hadharani matatizo yake ya kusikia. Hapo awali, alikuwa akikabiliana na changamoto hiyo kimya kimya huku akitafuta suluhisho mwenyewe.
Ufunuo huu umewaacha mashabiki na wafuasi wake wakiwa na hisia mseto — wengine wakimuonea huruma, na wengine wakiahidi kumsaidia.
Kisa cha Hanifa kinazua mjadala kuhusu changamoto za wagonjwa wa masikio, pua na koo nchini. Wataalamu wa afya wanasema huduma za aina hii bado ni chache, huku vifaa na madaktari bingwa vikipatikana zaidi katika hospitali chache kubwa mijini.
Takwimu kutoka Shirika la Afya Duniani zinaonyesha kuwa zaidi ya watu milioni 430 duniani wanakabiliwa na matatizo makubwa ya kusikia, huku Afrika Mashariki ikiwa na idadi kubwa ya wagonjwa wasiopata matibabu kwa wakati.
© Radio Jambo 2024. All rights reserved