Gachagua Asema Hata Yeye Ametosha Kuwa Rais 2027

NAIROBI, KENYA, Septemba 7, 2025 — Naibu Rais wa zamani, Rigathi Gachagua, amejitokeza wazi akitangaza kwamba hata yeye “atosha kuwa rais wa Kenya” iwapo wananchi na muungano wa upinzani watamteua kama mgombea wao katika uchaguzi wa 2027.

Amesema kuwa japo yuko tayari kufuata uamuzi wa pamoja wa viongozi wa upinzani, hana shaka na uwezo wake wa kukalia kiti cha Ikulu na kumaliza utawala wa Rais William Ruto baada ya muhula mmoja pekee.

Umoja Kwanza, Nafasi Baadaye

Akizungumza katika ibada ya kanisa Nyandarua Jumapili, Gachagua alisema upinzani umekubaliana kuwa na mgombea mmoja atakayekabiliana na Rais Ruto mwaka 2027.

“Natumekubaliana tutatoa candidate mmoja; tukisikizana ni Kalonzo, simtapigia yeye kura; tukisikizana ni Matiang’i, simtapigia kura; Eugene, Martha Karua na mimi pia simtapigia kura. Lakini msijidanganye, hata mimi atosha kuwa rais,” alisema huku akishangiliwa na wafuasi wake.

Wito kwa Mlima Kenya

Gachagua aliwaomba wakaazi wa eneo la Mlima Kenya wasiwe na hofu endapo jina lake halitapendekezwa.

“Jambo la muhimu ni mshikamano. Hata kama si mimi, tupigie kura yule atakayeteuliwa. Kwa sababu mimi pia nitakuwa sehemu ya huo muungano,” alisisitiza.

Kwa mtindo huu, kiongozi huyo alionekana kuonyesha ukomavu wa kisiasa na kuondoa hofu kwamba tamaa binafsi ya kuwania urais ingeweza kudhoofisha umoja wa upinzani.

Msimamo Kuhusu Kituyi

Wakati huo huo, Gachagua alilazimika kujibu malalamiko ya Naibu Kiongozi wa chama chake, Cleophas Malala, aliyepinga uteuzi wa Mukhisa Kituyi kama msemaji wa muungano wa upinzani.

Malala alidai nafasi hiyo ilistahili kutolewa kwa kijana mchanga ili kuonyesha usawa wa kizazi.

Hata hivyo, Gachagua alimtetea Kituyi akisema uzoefu wake wa kimataifa na kisiasa ni hazina muhimu kwa upinzani.

“Tumejaza vijana wengi kwenye sekretariati, na wanafanya kazi nzuri. Lakini tunahitaji pia mtu kama Mukhisa, mwenye uzoefu, kutusaidia katika safari hii. Si vibaya kuchanganya damu changa na hekima ya wazee,” alisema Gachagua.

Siasa za 2027 Zazidi Kupamba Moto

Kauli ya Gachagua inakuja wakati ambapo upinzani umekamilisha mchakato wa ndani wa kuunda muungano mpya, wenye jina, alama na bendera vitakavyotangazwa hivi karibuni.

Hatua hiyo inalenga kuandaa uwanja wa kisiasa kuelekea uchaguzi mkuu wa 2027, ambapo kambi hiyo inalenga kuhakikisha Rais Ruto anabaki na muhula mmoja pekee.

Kwa wachambuzi, tamko la Gachagua linaashiria kuwa kiongozi huyo hataki kuachwa nyuma katika mazungumzo ya kugawana madaraka, lakini pia hataki kuonekana kama kikwazo cha mshikamano.

Wafuatiliaji Watoa Maoni

Wadadisi wa siasa wanaona kuwa matamshi ya Gachagua ni siasa za hila na mbinu.

Mchambuzi mmoja kutoka Chuo Kikuu cha Nairobi alisema:

“Kwa kusema hata yeye anaweza kuwa rais, Gachagua anatuma ujumbe wa ndani kwamba asipuuzwe katika maamuzi ya mgombea wa urais. Lakini kwa kusisitiza mshikamano, anataka kujionyesha kama mzalendo wa muungano mzima.”

Hata hivyo, wachambuzi wengine wanasema si rahisi kwa Gachagua kujipenyeza kama mgombea wa urais wa upinzani, hasa kutokana na ushindani mkali wa wanasiasa wazoefu kama Kalonzo Musyoka, Martha Karua, na Fred Matiang’i.

Wapiga Kura Wajibu

Kwa upande wao, baadhi ya wakaazi wa Nyandarua walimpongeza Gachagua kwa uthubutu wake.

“Ni vizuri amesema ukweli. Tungependa kuona rais kutoka Mlima Kenya. Lakini kama si yeye, basi yeyote atakayechaguliwa na muungano tuko tayari kumsaidia,” alisema mmoja wa waumini baada ya ibada.

Wengine walionekana kuwa na wasiwasi iwapo upinzani utaweza kudumisha mshikamano hadi mwisho, wakikumbusha migawanyiko ya zamani iliyopelekea kushindwa kwa upinzani katika chaguzi zilizopita.

Safari ya Kisiasa

Gachagua, ambaye alikuwa Naibu Rais wa kwanza wa utawala wa Ruto, alijipata nje ya serikali baada ya mzozo wa ndani uliomfanya kugeukia kambi ya upinzani.

Kwa sasa, ameibuka kama sauti kuu katika siasa za Mlima Kenya, akijaribu kujipanga upya na kuhakikisha anabaki na nafasi ya kuzungumziwa kama kingmaker katika kinyang’anyiro cha 2027.

Kauli ya Gachagua kwamba “hata yeye atosha kuwa rais” imezua mjadala mkubwa. Ni kauli yenye kuonyesha uchu wa madaraka, lakini pia nia ya mshikamano.

Iwapo atapewa tiketi ya urais na muungano wa upinzani, basi uchaguzi wa 2027 unaweza kugeuka uwanja wa kivita kati ya “Ruto dhidi ya Gachagua”.

Lakini endapo atakosa, bado amejihakikishia nafasi ya kuendelea kuwa kiongozi mwenye ushawishi mkubwa katika mustakabali wa siasa za Kenya.