Mkutano wa kampeni wa chama cha Democracy for the Citizens Party (DCP) ulioongozwa na Rigathi Gachagua uligubikwa na vurugu Jumapili mchana mjini Narok baada ya polisi kurusha mabomu ya kutoa machozi sekunde chache kabla ya mgombea wake, Douglas Masikonde, kuchukua jukwaa.
Tukio hilo lililofanyika Novemba 24 liliwafanya wakazi kukimbia ovyo huku wakikohoa na kupaniki, na kuongeza mvutano wa kisiasa kabla ya uchaguzi mdogo wa Wadi ya Narok Township uliopangwa kufanyika Alhamisi.
Mabomu ya Kutoa Machozi Yasambaratisha Mkutano wa Gachagua Narok
Video iliyosambazwa na Rigathi Gachagua ilionyesha makombora ya mabomu ya kutoa machozi yakilipuka katikati ya umati, na kusababisha wafuasi kukimbia kwa hofu huku moshi mzito ukitanda eneo la mkutano.
Polisi walifyatua mabomu ya kutoa machozi ili kutawanya umati uliokuwa umefurika kwenye eneo la mkutano.
Gachagua, ambaye ni Naibu Rais wa zamani, alilaani hatua hiyo ya polisi akisema ni jaribio la kuinyamazisha kampeni yake.
Alisema tukio hilo linaendeleza kile alichodai kuwa ni mwenendo wa serikali ya Rais William Ruto kutumia vyombo vya usalama kuingilia mikutano ya kisiasa ya wapinzani.
Gachagua alidai zaidi ya maafisa 1,000 wa polisi walitumwa mjini Narok, na barabara kadhaa kufungwa ili kuzuia msafara wake kuingia katika eneo la mkutano.
Alidai, “Polisi wanaweka roadblocks ili nisiingie Narok. Sasa niko hapa. Serikali ya Rais Ruto inanihofia. Wametuma polisi zaidi ya elfu moja ili nisiwazungumzie.”
Gachagua Asema Serikali Inatumia Vitisho
Akiwahutubia kabla ya polisi kuingilia, Gachagua aliwahimiza wakazi kutokubali vitisho vinavyodaiwa kutumiwa kuzima kampeni za DCP.
Alisema hatua hizo hazitawazuia wakazi kumchagua Douglas Masikonde katika uchaguzi mdogo.
Aliwaambia wafuasi wake, “Msikhofu makundi madogo waliotumwa hapa kuwauzia hofu. Mchezo kama huu ndio utamfanya Masikonde ashinde,” kauli iliyopigiwa makofi na baadhi ya waliohudhuria.
Mkutano ulisitishwa ghafla baada ya raundi ya kwanza ya mabomu ya kutoa machozi kurushwa, na Gachagua pamoja na Masikonde kushuka jukwaani wakijaribu kujikinga na moshi mzito uliotanda.
Vurugu Zaanza Wakati Masikonde Anaposhika Maikrofoni
Tukio hilo lilitokea wakati Masikonde alipokaribia kuanza kuhutubia kwa mara ya kwanza siku hiyo.
Pindi tu alipochukua kipaza sauti, maafisa wa polisi walirusha makombora ya mabomu ya kutoa machozi kuelekea kwenye umati uliokuwa umejipanga mbele ya jukwaa.
Wakazi walionekana wakikohoa, wengine wakipoteza mwelekeo huku wakikimbia kwa taharuki wakijaribu kuepuka moshi.
Baadhi ya wafanyabiashara wa eneo hilo walifunga maduka yao kwa muda kutokana na hali ya sintofahamu.
Masikonde baadaye alisema tukio hilo linaonyesha jaribio la kuwanyima wananchi haki yao ya kuwasikiliza wagombea bila kuingiliwa na vyombo vya usalama.
Uchaguzi Mdogo Ulioibua Hisia Nchini
Uchaguzi mdogo wa Wadi ya Narok Township umevutia umakini wa kitaifa tangu kifo cha MCA Lukas Kudate mnamo Februari 16, 2024.
Nafasi hiyo imezua ushindani mkali kati ya vyama vya kisiasa vinavyowania ushawishi katika eneo hilo.
Chama tawala cha United Democratic Alliance (UDA) kimemsimamisha Kanyinke Ole Kudate, mwana wa kwanza wa marehemu.
Kanyinke alipata uungwaji mkono wa haraka baada ya wagombea kadhaa kujiondoa akiwemo mama wa kambo wa marehemu, Sarah Kudate, na mgombea wa Jubilee, Alfred Saruni. Wote walisisitiza umuhimu wa kumruhusu Kanyinke amalizie kipindi cha baba yake.
Kwa hiyo, uchaguzi wa Alhamisi unatarajiwa kuwa kipimo muhimu cha nguvu za vyama na mienendo mipya ya kisiasa katika Kaunti ya Narok.
Mvutano Waongezeka Kuelekea Siku ya Uchaguzi
Vurugu zilizotokea katika mkutano wa Gachagua zimeongeza joto la kisiasa katika kaunti ambayo imekuwa na msuguano wa kampeni katika miezi ya karibuni.
Wakazi wameripoti kuona doria nzito ya polisi kabla ya mkutano huo, hali ambayo imeibua maswali kuhusu usimamizi wa usalama na uhuru wa mikutano ya siasa.
Kiongozi mmoja wa jamii aliyeomba kutotajwa alisema kuwa tukio hilo limezua hofu miongoni mwa wakazi wanaotaka kuwasikiliza wagombea bila vitisho.
Alisema vyombo vya dola vinapaswa kuhakikisha utulivu badala ya kuchochea taharuki.
Athari kwa Siasa za Kitaifa
Uchaguzi wa Wadi ya Narok Township sasa umegeuka kuwa jaribio la kupima ushawishi wa Rigathi Gachagua dhidi ya utawala wa Rais Ruto.
Ushindi wa Masikonde unaweza kutafsiriwa kama kuongezeka kwa nguvu ya DCP, ilhali ushindi wa Kanyinke unaweza kuimarisha nafasi ya UDA katika eneo hilo.
Wachambuzi wanasema tukio la mabomu ya kutoa machozi linaweza kubadilisha maoni ya wapiga kura, kutegemea namna vinavyotumiwa na pande husika katika saa za mwisho za kampeni.
Joto Lazidi Kupanda Narok
Kadiri siku ya kupiga kura inavyokaribia, vyama vinakaza kampeni na kutafuta kura za mwisho.
Tukio la kuvuruga mkutano wa Gachagua limeibua maswali mapya kuhusu matumizi ya vyombo vya usalama katika chaguzi na uhuru wa kisiasa katika misimu ya kampeni.
© Radio Jambo 2024. All rights reserved