Mzozo baada ya Colombia kukataa kuruhusu ndege za kijeshi za Marekani zilizobeba wahamiaji waliofukuzwa kutua

Marekani na Colombia zilijiondoa kwenye ukingo wa vita vya kibiashara siku ya Jumapili baada ya Ikulu ya Marekani almaarufu White House kusema serikali ya Colombia imekubali kupokea ndege za kijeshi zinazowabeba wahamiaji waliofukuzwa.

Rais wa Marekani Donald Trump alikuwa ametishia kuiwekea Colombia ushuru wa forodha na vikwazo ili kuiadhibu kwa hatua ya awali ya kukataa ndege za kijeshi kuwaingiza watu waliofurushwa huku kukiwa na ufurushaji mkubwa wa wahamiaji haramu Marekani.

Lakini katika taarifa yake Jumapili jioni, Ikulu ya White House ilisema Colombia hatimaye imekubali kuwapokea wahamiaji hao na hawatatoa adhabu yake iliyotishiwa.

"Serikali ya Colombia imekubali masharti yote ya Rais Trump, ikiwa ni pamoja na kukubalika bila vikwazo kwa wageni wote haramu kutoka Colombia waliorudi kutoka Marekani, ikiwa ni pamoja na ndege za kijeshi za Marekani, bila kikomo au kuchelewa. Matukio ya leo yanaweka wazi kwa ulimwengu kwamba Amerika inaheshimiwa tena," Rais Trump alisema.

Waziri wa mambo ya nje wa Colombia, Luis Gilberto Murillo, alisema jioni ya Jumapili kwamba wamesuluhisha mzozo na serikali ya Amerika.

"Tutaendelea kupokea raia wa Colombia ambao watarudi kama wahamishwaji," Murillo alisema.

Taarifa yake hata hivyo haikusema haswa kwamba makubaliano hayo yalijumuisha safari za ndege za kijeshi, lakini hayakupingana na tangazo la Ikulu ya White House.

Rais wa Colombia, Gustavo Petro, awali alisema angewakubali tu raia waliorudi kwa heshima, kama vile kwenye ndege za kiraia, na alikuwa amerudisha nyuma ndege mbili za jeshi la Merika na raia wa Colombia waliorudishwa makwao.

Rais wa Marekani alijibu kwa ukali, akiweka wazi kwamba ndege hizo zilikuwa na idadi kubwa ya wahalifu haramu.

Trump alimshutumu rais wa Colombia Gustavo Petro kwa kuhatarisha usalama wa taifa la Marekani na usalama wa umma na akaagiza utawala wake mwenyewe kuchukua hatua zifuatazo za haraka na za kulipiza kisasi ikiwa ni pamoja na kuongeza ushuru maradufu kwa mauzo ya nje ya Colombia kwenda Marekani hadi 50%; marufuku na ubatilishaji wa viza kwa maafisa wa serikali ya Colombia na washirika wote na wafuasi, na ukaguzi ulioimarishwa wa raia wote wa Colombia na mizigo inayoingia Marekani kwa kile alichokiita misingi ya usalama wa taifa.