Bi Maria Wangari Kamunge, maarufu kama Rish Kamunge, ambaye ni mtayarishaji wa maudhui mashuhuri kwenye TikTok, anatarajiwa kufikishwa mahakamani leo, Ijumaa, Machi 28, kwa ajili ya uamuzi kuhusu ombi la upande wa mashtaka la kutaka azuiliwe kwa muda zaidi.
Kamunge, ambaye pia ni mkurugenzi wa kampuni ya Trustpine Travel Agency, anakabiliwa na tuhuma za kuwalaghai Wakenya kwa ahadi za kazi zisizokuwepo nchini Mauritius, ambapo inadaiwa aliwalaghai waathiriwa mamilioni ya pesa kwa ahadi bandia za ajira.
Kwa mujibu wa ripoti ya Idara ya Upelelezi wa Jinai (DCI), Kamunge anadaiwa kuwatapeli takriban waathiriwa 43, akiwatoza kati ya shilingi laki mbili na laki nne kwa kila mmoja kwa ahadi ya kuwawezesha kupata kazi nchini Mauritius.
Baadhi ya waathiriwa walifanikiwa kusafiri, lakini walipowasili Mauritius waligundua kuwa hakukuwa na kazi zilizokuwa zimeahidiwa. Walikwama uwanja wa ndege bila msaada wowote na hatimaye walirudishwa Kenya.
Taarifa za uchunguzi zinaonyesha kuwa jumla ya shilingi milioni 12.9 zilitumwa kwa Kamunge kutoka kwa waathiriwa wa mpango huo wa ulaghai.
Kamunge alikamatwa Jumatano, Machi 26 jijini Nairobi na wananchi waliokuwa wakimtafuta, kisha akakabidhiwa kwa polisi wa Kituo cha Polisi cha Central.
Tangu kukamatwa kwake, waathiriwa zaidi wamejitokeza na madai yanayofanana kuhusu madai hayo ya ulaghai. Mnamo
Machi 27, idara ya DCI iliwasilisha ombi maalum mahakamani wakitaka azuiliwe kwa siku saba zaidi ili kuruhusu uchunguzi kukamilika.
Leo Ijumaa, Hakimu Mkuu Lucas Onyina anatarajiwa kutoa uamuzi kuhusu ombi hilo.
Iwapo mahakama itaidhinisha ombi la DCI, Kamunge ataendelea kuzuiliwa kwa muda zaidi huku uchunguzi ukiendelea.
Iwapo mahakama itakataa ombi hilo, huenda akapewa dhamana na kuachiliwa kwa masharti maalum akisubiri kushtakiwa rasmi.
Wakati huo huo, DCI imewasihi Wakenya waliodhulumiwa na mpango huo wa ulaghai wa ajira kujitokeza na kuripoti katika Kituo cha Polisi cha Kati, Nairobi, ili kusaidia katika uchunguzi unaoendelea.
© Radio Jambo 2024. All rights reserved