Hatima ya Raila Kuamuliwa Leo: Fahamu Jinsi Uchaguzi wa AUC Utakavyoendeshwa Addis Ababa

Uchaguzi wa mwenyekiti na naibu mwenyekiti wa Tume ya Umoja wa Afrika (AUC) unatarajiwa kufanyika leo Februari 15.

 Uchaguzi huo ambao utaamua hatima ya wagombea watatu wanaowania nafasi ya mwenyekiti unatarajiwa kufanyika jijini Addis Ababa, Ethiopia. Marais na wakuu wa mataifa wasiopungua 50 watashiriki katika upigaji kura.

Wagombea wa nafasi hiyo ni;

·         Mahmoud Ali Youssouf kutoka Djibouti,

·         Raila Amollo Odinga kutoka Kenya, na

·         Richard Randriamandrato kutoka Madagascar.

 Umoja wa Afrika ulianzisha utaratibu wa kisasa na wa uwazi katika uchaguzi wa Mwenyekiti wa Tume la Umoja wa Afrika 2025.

 Utaratibu mpya unalenga kuhakikisha mgombea anayestahili atachaguliwa kwa njia ya haki, wazi na yenye ushirikiano wa pande zote.

Mfumo huu utahakikisha kuwa kiongozi atakayechaguliwa ni yule anayepata uungwaji mkono wa theluthi mbili ya kura kutoka kwa wapiga kura wote.

 Uchaguzi wa Tume ya Umoja wa Afrika utafanyika kama ifuatavyo:

 Halmashauri Kuu iliwachagua na kuwateua makamishna wakati wa Kikao chao kilichofanyika tarehe 12-13 Februari 2025.

 Baraza la Wakuu wa Nchi na Serikali litachagua na kuteua Mwenyekiti na Naibu Mwenyekiti wa tume wakati wa Kikao chao kitakachofanyika tarehe 15-16 Februari 2025.

 Katika uchaguzi wa Mwenyekiti, Naibu Mwenyekiti na Makamishna, upigaji kura utaendelea hadi mmoja wa wagombea apate theluthi mbili ya kura.

 Mchakato wa kupiga kura utaanza na wagombea wote kwenye karatasi ya kura.

 Upigaji kura utafanyika mara tatu na iwapo kura ya tatu itabaki bila mgombea yeyote kupata theluthi mbili ya kura, kura inayofuata itawekwa tu kwa wagombea wawili waliopata kura nyingi zaidi na mgombea aliye na kura chache ataondolewa.

 Pale ambapo kuna wagombea wawili tu awali na hakuna mgombea aliyepata wingi unaohitajika baada ya kura ya tatu, mgombea aliye na kura chache huondolewa na mgombea aliyesalia anaingia kwenye duru inayofuata.

 Iwapo mgombea aliyesalia atashindwa kupata theluthi mbili ya kura inayohitajika katika awamu ya mwisho, mwenyekiti anatakiwa kusimamisha uchaguzi.

 Iwapo kuna mgombea mmoja tu mwanzoni na akashindwa kupata theluthi mbili ya kura inayohitajika baada ya kura ya tatu, Mwenyekiti wa sasa anatakiwa kusimamisha uchaguzi.

 Kwa ujumla, mchakato huu umeundwa kwa umakini mkubwa ili kuhakikisha ushindani wa haki na uwazi. Mgombea anayestahili nafasi ya uongozi atakuwa yule ambaye ameonyesha uwezo mkubwa na msaada mkubwa kutoka kwa wapiga kura, na hatua hii itasaidia katika kuboresha utendaji wa Kamisho la Umoja wa Afrika, na kwa hiyo, maendeleo ya bara la Afrika.