Hisia Mseto Baada ya Mwanamke Mnigeria Kutupa Sodo 3 Zilizotumika kwa Wafanyakazi Wa Kenya Airways

Mtafaruku wa hivi majuzi kati ya abiria raia wa Nigeria na wafanyakazi wa Kenya Airways katika Uwanja wa Ndege wa Kimataifa wa Jomo Kenyatta (JKIA) umeibua mjadala mkali kwenye mitandao ya kijamii na kwenye vyombo vya habari.

Tukio hilo ambalo lilinaswa kwenye kamera lililohusisha abiria kutupa pedi zilizotumika kwa wafanyakazi wa shirika hilo la ndege limezua hisia mseto kutoka kwa watumiaji wa mitandao na mamlaka husika.

Siku ya Jumatatu, Shirika la Kenya Airways lilitoa taarifa rasmi kuhusu tukio hilo, ikieleza kwamba abiria Gloria Ibukun Omisore alikosa Visa ya Schengen, ambayo inahitajika kwa abiria wanaoingia katika nchi za Umoja wa Ulaya.

Kulingna na KQ, Omisore alikua akielekea Paris kupitia Nairobi, lakini alipogundulika kwamba hana visa, alikataa mabadiliko ya njia yaliyopendekezwa na shirika hilo, ambayo ingempeleka London kwanza kabla ya kuelekea Manchester.

Katika taarifa hiyo, Kenya Airways ilisema kwamba Omisore alidai malazi, jambo ambalo kampuni ilieleza kwamba halitolewi kwa abiria waliokataliwa kuingia kutokana na kukosa hati za uhamiaji.

Hali hiyo ilizidi kuzorota wakati Omisore alitoa na kutupa pedi tatu zilizotumika kwa wafanyakazi wa kampuni hiyo.

Kenya Airways ilikemea vikali kitendo hicho na kubainisha kuwa tukio hilo limeripotiwa kwa vyombo vya usalama kwa uchunguzi zaidi.

Tukio hili limezua mjadala mkubwa mtandaoni, ambapo watu wengi wameonyesha mitazamo tofauti.

Video ya tukio hilo ilienea haraka kwenye mitandao ya kijamii na kuibua hisia mseto miongoni mwa watumiaji wa mitandao kutoka Kenya na Nigeria.

Wakenya wengi walionekana kukosoa kitendo cha abiria kutupa pedi zilizotumika, wakisema ni kitendo cha dhihaka na kisicho na adabu.

Wengi wao pia walionekana kuungana na Kenya Airways kwa kutetea kanuni za ulinzi na heshima kwa wafanyakazi wa ndege.

Kwa upande mwingine, baadhi ya watumiaji haswa Wanigeria walielezea kuwa ni muhimu kuhakikisha kuwa utawala wa usafiri wa anga unazingatia haki zote za abiria, na wakiomba uchunguzi wa kina kuhusu tukio hilo.

Kutokana na tukio hili, Mamlaka ya Usafiri ya Anga ya Nigeria (NCAA) pia ilimwita Meneja wa Kituo cha Kenya Airways katika Uwanja wa Ndege wa Lagos kwa mazungumzo kuhusu suala hili.

NCAA ilisisitiza jukumu la Kenya Airways kuhakikisha kwamba abiria wana visa sahihi kabla ya kupanda ndege na ilikemea tabia isiyo ya kitaalamu kutoka kwa wafanyakazi wa ndege.

NCAA pia ilieleza dhamira yake ya kulinda haki za wadau wote na kuomba Kenya Airways kutoa ushahidi wa video za CCTV ili kuthibitisha madai hayo.

Uchunguzi wa tukio hili unaendelea, na unasisitiza umuhimu wa heshima na utaalamu katika kila mwingiliano katika sekta ya usafiri wa anga.