Ruto amkaribisha Askofu Edward Mwai Ikulu huku akizidi kukosolewa kwa kupokea Sh20m zake

Rais William Ruto amemkaribisha Askofu Edward Mwai wa kanisa la Jesus Winner Ministry katika Ikulu ya Nairobi mnamo Machi 6, 2025, wakati ambapo mhubiri huyo anaendelea kukosolewa vikali kwa kupokea mchango wa Shilingi milioni 20 kutoka kwa Rais mnamo Jumapili.

Kupitia taarifa yake baada ya mkutano huo, Rais Ruto aliipongeza Jesus Winner Ministry kwa kushiriki katika mpango wa serikali wa ajira kwa vijana kupitia Labour Mobility Programme, ambao umelenga kusaidia vijana kupata kazi nje ya nchi.

Alisema serikali itaendelea kuunga mkono juhudi hizo kama sehemu ya mpango mpana wa kupanua fursa za ajira na kipato kwa vijana wa Kenya.

"Tunashukuru kanisa la Jesus Winner Ministry kwa kushirikiana nasi katika mpango wa ajira kwa vijana kwa kuandaa zoezi la uandikishaji wa wafanyakazi, ambalo lina lengo la kuhakikisha vijana wetu wanapata nafasi za kazi nje ya nchi. Serikali itaendelea kusaidia juhudi hizi," alisema Rais Ruto.

Mbali na mpango wa ajira, Rais Ruto alisema Rev. Mwai alimfahamisha kuhusu maendeleo ya ujenzi wa kanisa la Jesus Winner Ministry huko Roysambu, ingawa hakutoa maelezo zaidi kuhusu mchango wa serikali katika mradi huo.

Hata hivyo, mkutano huo unajiri wakati ambapo mchango wa Sh20 milioni kutoka kwa Rais kwa kanisa hilo umeendelea kuzua mjadala mkali.

Wanasiasa wa upinzani na wanaharakati wa kijamii wameeleza wasiwasi wao kuhusu uhusiano wa karibu kati ya serikali na taasisi za kidini, wakidai huenda kuna ajenda fiche inayoendeshwa kupitia makanisa.

Tangu Jumatano, Machi 5, kanisa hilo limekuwa likiendesha zoezi la kuwaandikisha vijana kwa ajira, hatua ambayo imehusishwa na mpango wa serikali. Baadhi ya wachambuzi wameeleza kuwa hatua hiyo inazua maswali kuhusu iwapo kanisa hilo linapewa upendeleo wa moja kwa moja na serikali.

Hili limeongeza hisia kuwa serikali huenda ina ushawishi mkubwa ndani ya kanisa hilo, hasa baada ya mchango wa Rais na sasa mkutano wake na kiongozi huyo wa dini.

Wanasiasa wa upinzani na wanaharakati wa haki za kijamii wamesema hatua hiyo inazua maswali kuhusu uhusiano kati ya taasisi za kidini na serikali.

Kwa upande wake, Rev. Mwai hakuzungumzia moja kwa moja suala la mchango huo, badala yake alieleza kuwa alipata nafasi ya kumweleza Rais kuhusu maendeleo ya ujenzi wa kanisa lao jipya huko Roysambu.

Huku mjadala huu ukiendelea kushika kasi, serikali inasisitiza kuwa lengo lake kuu ni kusaidia vijana kupata ajira nje ya nchi.