Passaris awacharukia vikali Gen z's kwa uhariri tata wa picha ya Raila kuwania upapa

Mwakilishi wa Wanawake wa Kaunti ya Nairobi, Esther Passaris, ameibua mjadala mzito baada ya kulaani vikali picha zinazozagaa mitandaoni zikimuonyesha kiongozi wa chama cha ODM, Raila Odinga, akiwa amevalia mavazi ya Papa..

Picha hizo, ambazo zimehaririwa kidijitali, zimeonekana kusambazwa kwa lengo la ucheshi wa kisiasa lakini zimesababisha hisia kali miongoni mwa viongozi na wananchi.

Passaris, akizungumza katika kikao cha Bunge la Taifa mnamo Jumanne, Aprili 22, alisema kuwa kitendo hicho si tu dharau kwa Raila kama kiongozi wa taifa, bali pia ni dhihaka kwa waumini wa Kanisa Katoliki duniani.

"Nimeshtushwa sana kuona watu wakimvisha Baba Raila mavazi ya Papa katika picha za kejeli. Huu si ucheshi, huu ni ukosefu wa heshima kwa mtu ambaye ametoa mchango mkubwa katika historia ya nchi yetu. Ni pia dharau kwa mamilioni ya waumini wa imani ya Kikatoliki," alisema.

Passaris aliendelea kuwakumbusha vijana wa kizazi kipya kuwa mitandao ya kijamii si uwanja wa matusi bali wa mawasiliano yenye staha. Alionya kuwa uhuru wa kujieleza haumaanishi ruhusa ya kudhalilisha.

"Wapo vijana wanaotumia mitandao kuelimisha, kushirikisha, na hata kuburudisha kwa staha. Lakini hatuwezi kufumbia macho wale wanaotumia fursa hiyo kwa madharau. Lazima tuheshimu viongozi wetu na imani ya watu," aliongeza.

Kupitia mtandao wa X (zamani Twitter), Passaris pia alichapisha ujumbe akilaani picha hizo, akisema ni kiashiria cha kuporomoka kwa maadili.

"Kumvisha Raila mavazi ya Papa kwa kejeli si kichekesho—ni mfano wa jinsi jamii yetu inavyopoteza mwelekeo wa maadili. Tunaweza kupinga kwa hoja, si kwa dharau,” aliandika siku ya Jumatano asubuhi.

Mbunge huyo alisisitiza kuwa Raila Odinga si mwanasiasa wa kawaida, bali ni mtu ambaye historia ya Kenya haiwezi kutajwa bila jina lake.

Aidha, alimtaja Papa Francis kama kiongozi wa kiroho mwenye haiba ya unyenyekevu, na kusema kumcheka mmoja kwa sura ya mwingine ni kumdhalilisha wote wawili.

"Tuwaongoze vijana wetu kupinga kwa heshima. Kuna njia ya kuwasilisha tofauti za kisiasa bila kutumia kejeli," alihitimisha.