Ligi ya Mabingwa: Tazama ratiba ya robo fainali iliyothibitishwa huku Arsenal ikipimana nguvu na Real Madrid

Hatua ya 16 bora ya Ligi ya Mabingwa hatimaye ilikamilika usiku wa Jumatano, Machi 12, na sasa macho yote yanahamia kwenye robo fainali ambapo timu nane zilizobaki zitapambana kwa nafasi ya kutinga nusu fainali.

Miongoni mwa mechi zinazosubiriwa kwa hamu ni Arsenal dhidi ya Real Madrid, pamoja na Paris Saint-Germain wakikabiliana na Aston Villa.

Baada ya kuwabwaga PSV Eindhoven kwa ushindi wa jumla wa mabao 9-3, Arsenal sasa wanakabiliwa na mtihani mgumu dhidi ya mabingwa watetezi, Real Madrid.

Kikosi cha Mikel Arteta kilifanya kazi kubwa katika ushindi wao wa kwanza wa mabao 7-1 dhidi ya PSV, kabla ya kutoka sare ya 2-2 katika mchezo wa marudiano.

Kwa upande mwingine, Real Madrid walihitaji penalti kuwaondoa mahasimu wao wa jiji, Atletico Madrid, katika mchuano uliojaa utata kuhusu penalti ya Julian Alvarez iliyokataliwa.

Ushindi huo wa penalti umeweka miamba hao wa La Liga katika njia ya kukutana na Arsenal katika mechi inayotarajiwa kuwa na msisimko mkubwa.

Baada ya kuwatoa vinara wa Ligi Kuu ya Uingereza, Liverpool, kwa penalti, Paris Saint-Germain sasa wanakutana na Aston Villa, timu inayoongozwa na kocha wao wa zamani, Unai Emery.

Villa walipata nafasi ya kufika robo fainali kwa kuwalaza Club Brugge kwa jumla ya mabao 6-1.

Mchuano huu utaleta hamasa kubwa, si tu kwa sababu ya ubora wa vikosi vyote viwili, lakini pia kwa sababu ya Emery kukutana na klabu yake ya zamani huku akiwa na lengo la kuipeleka Aston Villa hatua ya nusu fainali kwa mara ya kwanza.

Barcelona walikuwa wa kwanza kufuzu robo fainali baada ya kuifunga Benfica kwa jumla ya mabao 4-1. Miamba hao wa La Liga sasa watakutana na Borussia Dortmund, ambao walipata nafasi yao kwa kuwashinda Lille.

Bayern Munich walitamba dhidi ya wapinzani wao wa Bundesliga, Bayer Leverkusen, kwa ushindi wa mabao 5-0, huku Harry Kane akichangia mabao matatu. Ushindi huo umewavusha hadi robo fainali ambapo watakutana na Inter Milan, timu iliyowatoa Feyenoord kwa urahisi.

Ratiba Kamili ya Robo Fainali ya Ligi ya Mabingwa

• Arsenal vs Real Madrid
• Paris Saint-Germain vs Aston Villa
• Barcelona vs Borussia Dortmund
• Bayern Munich vs Inter Milan

Mechi za mkondo wa kwanza zitachezwa tarehe 8/9 Aprili 2025, huku marudiano yakifanyika tarehe 15/16 Aprili 2025.

Kwa sasa, mashabiki wa soka kote ulimwenguni wanasubiri kwa hamu mechi hizi, huku timu zikijiandaa kwa changamoto kubwa zinazowakabili katika safari ya kuelekea fainali ya Ligi ya Mabingwa.