Klabu ya Manchester City imetumia zaidi ya pauni milioni 30 (Ks 5b) kwa ada za mawakili ili kupambana na mashtaka 115 yanayohusiana na uvunjaji wa sheria za kifedha za Ligi Kuu ya England.
Ripoti za kifedha za City Football Group zimeonyesha kuwa klabu hiyo iliongeza matumizi yake ya kisheria kwa karibu pauni milioni 10.7 ndani ya msimu wa 2023-24, ikiwa ni wastani wa karibu pauni 205,000 kwa wiki.
Mashtaka haya, yaliyotangazwa Februari 2023, yanahusiana na madai ya ukiukaji wa kanuni za kifedha kati ya misimu ya 2009-10 na 2017-18.
Ligi Kuu inadai kuwa City walihifadhi mapato yao halisi ya kifedha kwa njia isiyo sahihi, ikiwa ni pamoja na kupotosha ripoti za mapato ya udhamini na malipo kwa makocha na wachezaji.
Katika kujitetea, Manchester City imeajiri wakili mashuhuri Lord Pannick KC wa Blackstone Chambers, anayesemekana kutoza takriban pauni 5,000 kwa saa moja ya huduma zake.
Lord Pannick alikuwa sehemu ya timu ya kisheria iliyosaidia City kushinda kesi yao dhidi ya marufuku ya miaka miwili ya kushiriki Ligi ya Mabingwa ya Ulaya iliyotangazwa na UEFA mnamo 2020.
Kesi hiyo ilianza kusikilizwa mnamo Septemba 16, 2024, katika Kituo cha Kimataifa cha Usuluhishi wa Migogoro cha London, na inatarajiwa kuchukua takriban wiki 10. Uamuzi wa mwisho unatarajiwa kutolewa mapema mwaka wa 2025.
Endapo City watapatikana na hatia, wanaweza kupewa adhabu kali kama vile kupunguzwa pointi kwenye msimamo wa ligi au hata kufukuzwa kabisa kutoka Ligi Kuu ya England.
Manchester City imeendelea kukanusha madai haya, ikisisitiza kuwa wana ushahidi wa kutosha wa kuthibitisha kutokuwa na hatia.
Klabu hiyo imesema kuwa itapambana na kesi hii kwa kutumia kila nyenzo inayowezekana ili kuhakikisha haki inatendeka.
Hii ni moja ya kesi kubwa zaidi za kifedha kuwahi kushuhudiwa katika historia ya soka, na matokeo yake yanaweza kuwa na athari kubwa kwa klabu, mashabiki, na mustakabali wa Ligi Kuu ya England kwa ujumla.
© Radio Jambo 2024. All rights reserved