Kiongozi wa chama cha ODM Raila Odinga ametangaza kwa mshangao kuwa atamuunga mkono Rais William Ruto hadi kipindi cha sasa cha uongozi kitakapokamilika mwaka wa 2027.
Hata hivyo, alifafanua kuwa uungwaji huo wa mkono una masharti—hakutakuwa na mazungumzo kuhusu uchaguzi wa urithi wa mwaka wa 2027 hadi pale serikali itakapotekeleza ahadi zake kuu.
Akizungumza katika mahojiano na NTV siku ya Jumapili nyumbani kwake Karen, Odinga alieleza kuwa ushirikiano wa sasa wa kisiasa na serikali ya Rais William Ruto ni hatua ya muda ya kuleta utulivu nchini, na si muungano wa kudumu wa kisiasa.
“Tumesema kwamba tuko katika serikali pana hadi mwaka wa 2027. Hatukusema kwamba tutafanya kazi na UDA baada ya 2027. Hayo ni masuala ambayo yatajadiliwa wakati ufaao, na uamuzi utafanywa na wanachama wa chama, si Raila Odinga peke yake,” alisema Raila.
Odinga alisema uamuzi wa kushirikiana na serikali ulisababishwa na haja ya kuzuia hali ya vurugu nchini kufuatia maandamano ya mwaka jana yaliyoongozwa na vijana, yaliyohusu masuala ya utawala, hali ngumu ya kiuchumi na ukatili wa polisi.
Alifichua kuwa nchi ilikuwa katika hatari ya kutumbukia kwenye mzozo mkubwa, na kwamba bila hatua ya haraka, hali ingeweza kuwa mbaya zaidi.
“Mwaka wa 2023 tulikuwa mitaani tukipaza sauti kuhusu haki ya uchaguzi, gharama ya maisha na ufisadi. Serikali ilijibu kwa ukatili, na tulipoteza takriban watu 70. Tulipojaribu kuwaheshimu marehemu hao, hakuna jaji aliyeturuhusu kufanya ibada ya kumbukumbu. Hatimaye tuliifanya kimya kimya,” alisema.
© Radio Jambo 2024. All rights reserved