Nikitaka kazi ya serikali hapa Kenya haiwezi nichukua zaidi ya dakika moja – Cassypool

MCHAMBUZI wa masuala mbalimbali ya kijamii, Cassypool amefichua kwamba ukaribu wake na rais William Ruto una mnato wa kipekee kiasi kwamba akitaka kazi ya serikali haitomchukua zaidi ya dakika moja.

Akizungumza na waandishi wa habari za burudani, Cassypool alisema kwamba kwa wakati mmoja Ruto aliwahi kumpa kazi serikalini lakini akaikataa.

Hata hivyo, uhusiano wake na kiongozi wa nchi bado ungali na mashiko ya kipekee, akifutilia mbali kwamba urafiki ulisambaratika ndio maana hajaonekana ikuluni katika siku za hivi karibuni.

Alisisitiza kwamba rais Ruto ni mmoja kati ya watu wangwana sana kukutana nao na kusema leo hii akaamua kutaka kazi serikalini ni kunyanua simu moja tu na chini ya dakika nzima kazi anayo.

“Nilikuwa na rais William Ruto kwenye ikulu na mliona kwenye mitandao ya kijamii. Kama kuna rais ambaye ni muungwana, rais ambaye ni mstaarabu ni William Samoei Ruto.”

“Mimi nikitaka leo hii kazi ya serikali hii nchi, haiwezi nichukua zaidi ya dakika moja kupiga simu na kupata kazi ya serikali. Kama kuna kitu siwezi hangaika kupata ni kazi ya serikali,” Cassypool alijigamba.

Lakini je, ni kipi ambacho kinamzuia kutopiga simu na kuwahi hiyo kazi?

Kwa mujibu wake, kazi za serikali zina taratibu zake maalum ambayo kwa njia moja au nyingine zinamkalia vigumu kuziendea.

“Lakini kazi ya serikali iko na taratibu ya kwanza huwezi kufanya siasa, huwezi kupiga mbwebwe, huwezi kusafiri kwenda Tanzania kufanya siasa tena Tanzania ama kufanyia serikali ya kule kazi kwa sababu wewe ni mwajiriwa wa serikali.”

“Sasa mimi niko passionate kuhusu mama Samia Suluhu nataka yeye ashinde muhula mwingine wa urais mwezi Oktoba na mimi ni influencer kutoka Kenya. Hivyo mimi siwezi kuchukua kazi ya serikali [ya Kenya] kama nampigia debe Samia, kwa sababu itanifungia kusema mema na mazuri maana kuna kanuni za serikali huwezi kuenda kuzungumzia vitu tofauti,” alieleza.

Alitaja ukuruba wake na rais wa Tanzania Samia Suluhu Hassan kama sababu iliyomfanya kukataa kazi ya serikali ya Kenya kutoka kwa William Ruto.