Kanye West Atoa Wito wa Kuachiliwa Huru kwa Diddy, Akashifu Ukimya wa Watu Maarufu

Rapa maarufu wa Marekani Kanye West ameibua mijadala mitandaoni baada ya kutoa wito wa kuachiliwa huru kwa msanii mwenzake Sean "Diddy" Combs almaarufu P Diddy, ambaye kwa sasa yuko kizuizini akisubiri kesi yake inayohusiana na mashtaka ya usafirishaji wa binadamu, dhulma za kingono na uhalifu wa kupangwa.

Kupitia ukurasa wake wa mtandao wa X, Kanye alichapisha ujumbe akisema "FREE PUFF" (MUACHILIE HURU PUFF), akimaanisha kuwa Diddy anapaswa kuachiliwa huru.

Rapa huyo aliongeza kuwa watu mashuhuri wanakaa kimya kuhusu suala hilo, jambo ambalo anaona kuwa linaathiri jamii ya watu weusi kwa ujumla.

Katika moja ya jumbe zake, Kanye alieleza kuwa Diddy amekuwa na mchango mkubwa katika tasnia ya muziki na jamii kwa ujumla, na kwamba kuna hujuma dhidi yake.

 "Hatuwezi kumwacha hivi. Historia yake inapaswa kuzingatiwa," aliandika, huku akisisitiza kuwa Diddy amesaidia wasanii wengi kupata nafasi katika tasnia ya burudani.

Zaidi ya hayo, Kanye alishiriki mazungumzo ya simu na Christian "King" Combs, mwana wa Diddy, akionyesha mshikamano wake na familia ya msanii huyo.

Alieleza kuwa kukamatwa kwa Diddy ni sehemu ya mfumo mpana wa kuvunja familia za watu weusi na kudhoofisha uongozi wao katika sekta mbalimbali.

Kauli hizi za Kanye zimepokelewa kwa mitazamo tofauti.

Wafuasi wake wengine wamesifia ujasiri wake wa kuzungumza, huku wengine wakimkosoa kwa kutetea mtu anayekabiliwa na mashtaka mazito.

Sean "Diddy" Combs alikamatwa mapema mwaka jana na kwa sasa anashikiliwa katika gereza la Metropolitan Detention Center, Brooklyn, akisubiri kesi yake mwezi Mei 2025.

Wakili wake tayari amekanusha mashtaka yote, akidai kuwa Diddy ni mhanga wa madai yasiyo na msingi.

Wachambuzi wa masuala ya burudani wanaona hatua ya Kanye kama mwendelezo wa hulka yake ya kuzungumza wazi kuhusu masuala yenye utata, huku ikikumbukwa kuwa amewahi kuwa na uhasama wa maneno na Diddy hapo awali.

Huku kesi hiyo ikitarajiwa kusikilizwa, bado haijulikani ikiwa wito wa Kanye utakuwa na athari yoyote kwa mchakato wa kisheria unaoendelea