Kanye West na Bianca Censori Watengana Siku Chache Baada ya Mavazi Tata ya Grammys

Mwanamuziki mashuhuri wa Marekani, Kanye West, na mke wake, Bianca Censori, wamedaiwa kutengana baada ya ndoa yao ya miaka miwili.

Hii ni ikiwa ni siku chache tu baada ya tukio la utata katika hafla ya tuzo za Grammy 2025.

Taarifa za kuachana kwao zimeibuka nchini Marekani huku vyanzo vya karibu vikidai kuwa Bianca amechoshwa na vitendo vya hivi majuzi vya Kanye na ameamua kujitenga.

Katika tuzo za Grammy zilizofanyika hivi karibuni, Kanye na Bianca walivutia macho ya wengi kutokana na mavazi yao ya kushangaza.

Kanye, anayejulikana kwa mitindo yake ya kipekee, alivalia mavazi meusi yaliyofunika mwili mzima, huku Bianca akiwa amevaa vazi lililokuwa wazi kupita kiasi, hali iliyozua gumzo mitandaoni.

Baadhi ya mashabiki walihisi kuwa Bianca amegeuzwa kuwa "chombo cha sanaa" cha Kanye, huku wengine wakiona kama ni njia yake ya kujitafutia umaarufu zaidi.

Kwa mujibu wa vyanzo vya karibu na wawili hao, Bianca amekuwa akihisi shinikizo kubwa kutoka kwa Kanye, hasa katika uhusiano wao wa hadharani.

Kanye, ambaye mara nyingi amekuwa katika vichwa vya habari kwa matamshi yake tata, amekuwa akikosolewa vikali kwa kauli zake zenye utata, ikiwa ni pamoja na zile zinazohusiana na chuki dhidi ya Wayahudi.

Inaelezwa kuwa Bianca, licha ya upendo wake kwa Kanye, amekuwa akihisi kuzidiwa na mazingira yanayomzunguka na hatimaye kuamua kujitenga.

Ripoti zinaonyesha kuwa tayari wanandoa hao wameanza mchakato wa kutengana rasmi, huku wakili wa Bianca akihusika katika taratibu za kisheria.

Hata hivyo, msemaji wa Kanye amekanusha madai hayo, akisisitiza kuwa bado wako pamoja na wanapanga kusherehekea Siku ya Wapendanao.

Kwa sasa, mashabiki wa Kanye West wanasubiri kuona iwapo kutakuwa na uthibitisho rasmi kutoka kwa wawili hao.

Kutokana na historia ya Kanye ya kuwa na mahusiano yenye drama, wengi wanajiuliza ikiwa huu ndio mwisho wa safari yao pamoja, au ni mojawapo ya changamoto ambazo uhusiano wao umepitia.

Tutaendelea kufuatilia maendeleo ya sakata hili na kutoa taarifa zaidi kadri zinavyoibuka.