Kibet Awaambia Waluhya: Jiandaeni Kuchukua Uongozi 2032

KAKAMEGA, KENYA, Ijumaa 26, 2025 — Msaidizi wa Rais William Ruto, Bw. Farouk Kibet, amewataka wakazi wa jamii ya Waluhya kujipanga kuchukua nafasi ya uongozi baada ya kipindi cha pili cha Rais kumalizika mwaka 2032.

Akizungumza katika hafla ya shukrani nyumbani kwa Bw. Simon Kangwana, aliyeshindwa katika kura za mchujo za UDA kwa uchaguzi mdogo wa ubunge eneo la Malava, Bw. Kibet alisema kuwa ni lazima Ukanda wa Magharibi umuunge mkono Rais Ruto katika kura za 2027 ili kuimarisha nafasi yake katika siasa za urithi.

“Si jambo la ajabu; linaweza kutimia. Waluhya na Wakalenjin wamekuwa majirani wema kwa miaka mingi, na Bonde la Ufa linatambua mchango mkubwa wa jamii ya Waluhya katika serikali ya Kenya Kwanza,” alisema.

Kauli yake ilijiri siku moja tu baada ya wabunge kutoka Ukanda wa Magharibi wakiongozwa na Spika wa Bunge la Kitaifa Moses Wetang’ula pamoja na Waziri wa Vyama vya Ushirika na Biashara Ndogo na za Wastani, Bw. Wycliffe Oparanya, kutangaza kuwa jamii ya Waluhya itadai nafasi ya Naibu Rais mwaka 2027.

Miongoni mwa viongozi waliotoa tamko hilo ni wabunge Titus Khamala (Lurambi), Bernard Shinali (Ikolomani), Christopher Aseka (Khwisero), Nabii Nabwera (Lugari), John Waluke (Sirisia), Emmanuel Wangwe (Navakholo), Seneta Wafula Wakoli (Bungoma), na Mwakilishi wa Kike wa Kakamega, Bi. Elsie Muhanda.

Walisisitiza kuwa idadi kubwa ya wapiga kura kutoka jamii ya Waluhya inawapa uhalali wa kudai kiti hicho. Aidha, waliahidi kuunga mkono azma ya Rais Ruto kuchaguliwa tena mwaka 2027 ili kupata baraka zake kuelekea 2032.

Hata hivyo, Bw. Kibet aliwaonya wakaazi wa Malava dhidi ya kuhama na kujiunga na upinzani. “Huwezi kuacha ugali ulio mezani kwa ajili ya maji yanayochemka jikoni, kwani hujui kama maji hayo ni ya kuoga au ya kuoshea vyombo; mwisho unaweza kulala njaa,” akasema huku akipokelewa kwa shangwe.

Katika hafla hiyo, Bw. Kibet alitoa mchango wa Shilingi milioni moja kusaidia Shule ya Msingi ya Mutola.

Bw. Kangwana pamoja na Bw. Leonard Shimaka, waliopoteza katika kura za mchujo dhidi ya Bw. David Ndakwa, walisisitiza uaminifu wao kwa chama cha UDA na serikali ya Kenya Kwanza.

“Ajenda ya Mageuzi ya Bottom-Up imeonyesha matokeo kupitia mgao wa rasilimali na pembejeo za kilimo. Ni lazima tusimame na serikali iliyoko madarakani,” alisema Bw. Kangwana.

Naye Bw. Shimaka aliongeza: “Ingawa tumeshindwa, bado tutaendelea kuwa mstari wa mbele katika chama, tukipigania maendeleo ya eneo la Malava.”

Mbali na siasa, Bw. Kibet alionya vijana dhidi ya kudorora katika masomo kwa sababu ya uraibu wa dawa za kulevya. “Mpeni heshima kazi zenu, maana kazi ndiyo inayoleta mkate mezani na kuendeleza familia zenu,” alihitimisha.