Kizza Besigye aripotiwa kukimbizwa hospitalini akiwa mahututi, siku kadhaa baada ya kususia chakula

Kiongozi wa upinzani wa Uganda Kizza Besigye mnamo siku ya Jumapili aliripotiwa kukimbizwa katika kituo cha afya kilichopo Bugolobi Village Mall, jijini Kampala, kwa matibabu ya dharura, huku akisindikizwa na maafisa wa usalama kwa ulinzi mkali.

Kwa mujibu wa Mbunge wa Buhweju, Francis Mwijukye, Besigye aliwasilishwa katika kituo hicho kilichopo ghorofa ya tatu akiwa ameketi kwenye kiti cha magurudumu.

Maafisa wa usalama waliripotiwa kuzingira eneo hilo na kuweka vizuizi vinavyodhibiti harakati za watu ndani na nje ya kliniki hiyo, inayojulikana kama The Clinic.

Vyombo vya habari vya Uganda vinasema hata hivyo, uongozi wa The Clinic ulikataa kutoa maelezo kuhusu hali ya Besigye, ukisisitiza kuwa taarifa za wagonjwa ni za siri.

"Hii ni taasisi ya afya na tunafuata taratibu za usiri. Samahani, hatuwezi kutoa taarifa yoyote," alisema mfanyakazi mmoja wa kliniki hiyo alipoulizwa na wanahabari.

Naibu Meya wa Kampala, Doreen Nyanjura, ambaye ni mshirika wa karibu wa Besigye, alithibitisha kuwa mwanasiasa huyo anapata matibabu, ingawa hakutoa maelezo zaidi kuhusu hali yake.

Besigye, ambaye amezuiliwa kwa karibu miezi mitatu licha ya Mahakama ya Juu kuagiza aachiliwe, alionekana akiwa dhaifu na akipata tabu kupumua alipofikishwa mahakamani wiki jana, jambo lililozua hisia kali miongoni mwa wafuasi wake.

Wiki iliyopita, Besigye alifikishwa katika Mahakama ya Hakimu Mkuu wa Barabara ya Buganda, akionekana dhaifu na mgonjwa, huku mabega yake ya mifupa yakilegea.

Mashavu yake yaliyozama na macho matupu yaliashiria siku ndefu bila kula chakula kinachofaa huku ngozi yake ikiwa nyembamba juu ya shavu lake maarufu.

Macho yake yakiwa yanazunguka katika chumba cha mahakama, mtu aliweza kuona kwamba yalikuwa yakipepea kwa mchanganyiko wa wasiwasi na kutokuwa na uhakika.

Mawakili wake wakiongozwa na Erias Lukwago waliambia mahakama kuwa kesi hiyo isiendelee.

Alisema hali ya kiongozi huyo wa upinzani haitoi nafasi ya kuendelea na shughuli za siku hiyo, ni sawa na ukiukwaji wa haki zake za kibinadamu.

Besigye alikamatwa mnamo Novemba 16, 2024, na kufunguliwa mashitaka ya uhaini katika mahakama ya kijeshi.

Ingawa Mahakama ya Juu iliamuru aachiliwe mwezi uliopita, bado anazuiliwa katika Gereza la Luzira, hali inayozua maswali kuhusu kutotekelezwa kwa uamuzi wa mahakama.

 Magereza ya Uganda yameendelea kusisitiza kuwa Besigye anapata huduma zote za afya zinazostahili, lakini wafuasi wake wanapinga madai hayo, wakisema hali aliyokuwa nayo mahakamani ni ushahidi tosha wa kudhoofika kwake.