"Papa alilala, anapumzika"- Vatican yatoa taarifa mpya kuhusu hali ya Papa Francis

Kiongozi wa Kanisa Katoliki, Papa Francis, anaendelea kupokea matibabu katika Hospitali ya Gemelli jijini Roma, Italia huku hali yake ikiendelea kuangaliwa kwa karibu na madaktari.

Taarifa mpya kutoka Vatican zimeeleza kuwa Baba Mtakatifu alilala usiku wa Jumapili kwa utulivu, lakini hali yake bado ni ya kutia wasiwasi.

"Usiku ulikwenda vizuri; Papa alilala na anapumzika," ilisoma taarifa ya Vatican.

Kwa mujibu wa msemaji wa Vatican, Papa Francis, ambaye ana umri wa miaka 88, anapambana na nimonia ya mapafu yote mawili pamoja na hatua za awali za kufeli kwa figo.

Kutokana na hali hii, amewekwa kwenye tiba ya oksijeni yenye mtiririko wa hali ya juu, huku pia akiongezewa damu ili kukabiliana na upungufu wa damu na hesabu ya chini ya platelet.

"Baba Mtakatifu amepata usingizi mzuri usiku wa jana, lakini madaktari wanaendelea kufuatilia hali yake kwa makini," alisema msemaji wa Vatican, Matteo Bruni.

"Anaendelea kupokea matibabu kwa utulivu na kushiriki ibada za Misa kutoka chumbani mwake,” aliongeza.

Ingawa hali yake ni tete, Vatican imeeleza kuwa anapata utulivu wa kutosha na bado anaendelea kushiriki ibada za Misa kutoka chumbani mwake hospitalini.

Aidha, Papa Francis ameelezea shukrani zake kwa waumini na watu wote wanaomuombea afya njema katika kipindi hiki kigumu.

Papa Francis alilazwa hospitalini mnamo Februari 13, 2025, baada ya kuonyesha dalili za kupungua nguvu na matatizo ya kupumua.

Vipimo vya awali vilithibitisha kuwa alikuwa na nimonia, hali iliyosababisha madaktari kumpatia matibabu ya dharura.

Aidha, madaktari walibaini kuwa figo zake zilianza kushindwa kufanya kazi kwa ufanisi, jambo lililohitaji uangalizi wa haraka.

Katika siku chache zilizopita, kumekuwa na hofu miongoni mwa waumini wa Kanisa Katoliki duniani kote, huku viongozi wa dini, wanasiasa na raia wa kawaida wakiendelea kumtumia jumbe za faraja na maombi.

Miongoni mwa waliotoa salamu za pole ni Rais wa Italia, Sergio Mattarella, na Katibu Mkuu wa Umoja wa Mataifa, António Guterres, ambao wote wameelezea matumaini yao kuwa Papa Francis atapona haraka.

Tangu achaguliwe kuwa Papa mnamo mwaka 2013, Baba Mtakatifu Francis amekuwa akihimiza huruma, mshikamano wa kijamii, na uadilifu ndani ya jamii.

Hata akiwa hospitalini, ameendelea kuwasiliana na viongozi wa Kanisa na kushiriki katika maamuzi muhimu kwa njia ya maandishi na simu.

Kwa sasa, madaktari wanaendelea kufuatilia hali yake kwa karibu, huku waumini wakiombwa kuendelea kumwombea ili apate nafuu haraka.

Vatican imesisitiza kuwa itatoa taarifa za mara kwa mara kuhusu maendeleo ya afya yake kadri siku zinavyosonga.