Waislamu 25 wakamatwa kwa kula, kuuza chakula hadharani wakati wa Ramadhani

Katika hatua kali za kutekeleza sheria za Kiislamu, polisi wa Hisbah katika jimbo la Kano, kaskazini mwa Nigeria, wamewakamata Waislamu 25 waliokutwa wakila, kunywa, au kuuza chakula wakati wa mchana katika mwezi mtukufu wa Ramadhani.

Kwa mujibu wa Naibu Kamanda wa Hisbah, Mujahid Aminudeen, watu 20 walitiwa mbaroni kwa kula hadharani huku wengine watano wakikamatwa kwa kuuza chakula.

Operesheni hiyo ilifanyika siku ya Jumatatu, Machi 3, 2025, na inatarajiwa kuendelea kwa kipindi chote cha Ramadhani.

"Tunalenga tu Waislamu kwa sababu wanawajibika kufuata saumu. Wasio Waislamu hawahusiki," alifafanua Aminudeen. Aliongeza kuwa vitendo vya kudharau Ramadhani havitavumiliwa.

"Itashangaza kuona Waislamu wazima wakikiuka saumu waziwazi katika mwezi huu mtukufu. Hisbah haiwezi kukaa kimya, ndiyo maana tumechukua hatua," alisema.

Waliokamatwa tayari wamefikishwa katika mahakama ya Sharia kwa hatua zaidi za kisheria.

Mwaka uliopita, watuhumiwa wa makosa kama haya walipewa nafasi ya kuahidi kufunga, lakini safari hii hawakupata bahati hiyo—wanakabiliwa na adhabu rasmi kutoka mahakamani.

Kwa mujibu wa Hisbah, baadhi ya waliokamatwa waliripotiwa na wananchi waliowashuhudia wakila hadharani.

"Wananchi huwasiliana nasi mara kwa mara wanapowaona watu wakila mchana, na sisi tunachukua hatua mara moja," alisema Aminudeen.

Mbali na kuwakamata waliovunja saumu, Hisbah pia ilifanya msako dhidi ya watu waliokuwa na "mitindo ya nywele isiyofaa," waliovaa kaptula fupi, pamoja na madereva wa bajaji waliokuwa wakiwachanganya abiria wa jinsia tofauti.

Ramadhani, mwezi wa tisa wa kalenda ya Kiislamu, ni kipindi cha ibada maalum ambapo Waislamu wanaamini kuwa Quran iliteremshwa kwa Mtume Muhammad.

Kufunga ni moja ya Nguzo Tano za Uislamu na ni wajibu kwa Waislamu watu wazima, isipokuwa kwa wale walio na udhuru wa kiafya.

Katika majimbo 12 ya kaskazini mwa Nigeria ambapo sheria za Sharia zinatumika sambamba na sheria za kitaifa, saumu si hiari kwa Waislamu bali ni wajibu wa kidini na wa kisheria. Ramadhani ya mwaka huu inatarajiwa kuhitimishwa Jumapili, Machi 30, 2025.